Ermənistan Baş naziri Nikol Paşinyan bu gün keçirdiyi hökumət iclasında Ermənistanla Azərbaycan arasında yeni sənədin imzalana biləcəyini təsdiqləyib. Bu barədə “RİA Novosti” məlumat yayır. Paşinyan qeyd edib ki, Azərbaycan razılıq verərsə, sənədi imzalayacaq. Onun sözlərinə görə, danışıqlar davam etdiyi üçün sənədin məzmunu hələ təqdim edilməyəcək.
Məlumdur ki, son günlər sərhədlərin delimitasiyasına dair müəyyən gərginliklər var. Ermənistan tərəfi hər zamankı kimi mövcud durumu öz xeyrinə dəyişmək istəyir. Maraqlıdır belə bir məqamda Paşinyan hansı sənədi nəzərdə tutur?
Sualımızı cavablandıran siyasi analitik Turab Rzayev “Sherg.az”a bildirib ki, Paşinyan iki məsələyə dair sənədi nəzərdə tuta bilər:
“Birincisi, sərhədlərin delimitasiyası və Zəngəzur dəhliz ilə ağlı olan məsələdir. Məlumdur ki, düşməndə qalmış ərazilərimiz var. Qazağın 7 və Naxçıvanın Kərki kəndi onlarda qalıb. Bu baxımdan sərhədlərin bölünməsi və həmin anklavda olan ərazilərin qaytarılması barədə sənəd ola bilər”.
T.Rzayev qeyd edib ki, Paşinyanın nəzərdə tutduğu məsələ yekun sülh bəyanatına oxşar sənəddir:
“Çünki noyabrın 10-dakı üçtərəfli bəyanat tezbazar imzalanmışdı. Bu baxımdan Paşinyan daha geniş və əhatəli sülh müqaviləsini fikrində tuta bilər. Hazırda Ermənistandakı gərginlik də məhz bununla bağlıdır. Çünki ölkədəki müxalifət və Ermənistanın keçmiş xarici işlər nazir Zöhrab Mnatsakanyan hakimiyyəti şantaj edir. Paşinyanı ölkənin maraqlarını satıb, müqavilə imzalamaq aruzusunda olduğunu bildirirlər. Bu baxımdan Ermənistandakı müxalifət milli maraqlarının təhlükə altında olduğunu düşünürlər.
Beləliklə, silahlı qüvvələri toplayıb ölkəni qorumaq istəyirlər. Lakin Paşinyan bildirir ki, əslində belə müqaviləni imzalamaqla Ermənistanın mövqeyini qoruyur. Onun sözlərinə görə, “hətta bu sənəd tamamilə xeyrimizədir”. Belə çıxır ki, Paşinyan sözügedən müqavilənin imzalanmasına razıdır, sadəcə Azərbaycan tərəfinin fikrini gözləyir. Guya sənəd Ermənistanın xeyrinədir, ona görə də Paşinyan imza atıb və bəlkə, Azərbaycan razı olub, imzalamayacaq. Paşinyan belə fikir formalaşdırdıqdan sonra Mnatasakyan onu milli maraqlara zidd çıxış etməkdə günahlandırıb”.
Analitikin qənaətincə, müqavilənin şərtləri açıqlandıqdan sonra görəcəyik ki, bu, daha çox kimin maraqlarına xidmət edir:
“Maraqlıdır Paşinyanın dediyi kimi Ermənistan öz maraqlarını qoruya biləcəkmi, yoxsa müxalifətin dediyi kimi olacaq. Hiss olunur ki, Paşinyanın komandasının içində kimsə ona xəyanət edir və müəyyən məlumatlar Mnatsakanyana ötürür.
Çünki İkinci Qarabağ müharibəsinin bitməsinə yaxın iddia edilmişdi ki, Ermənistan şərtsiz olaraq kapitulyasiyaya hazırlaşır.
Həmin iddialardan bir neçə gün keçməmiş Ermənistan həqiqətən də hərbi cəhətdən fiaskoya uğradı və bəyanatı imzalamağa məcbur oldu. Görünür, Paşinyan bu dəfə etiraf edib ki, “bəli, müqavilə var, amma maraqlarımıza xidmət etmir”. Ona görə də yeni sənədi təklif edib.
Hər iki müqavilə hazırlananda ictimaiyyətə elan olunmazdan qabaq müxalifətin, Sarkisyan və Köçəryanın, həmçinin Mnatasakyanın bundan xəbəri olur. Ya vasitəçilər, ya da Paşinyanın komandası daxilindən məlumatı ötürənlər var. Əslində bu durum da Paşinyan üçün zəiflik deməkdir”.
