Normallaşma prosesi başlayıb
ABŞ Konqresi Ankaraya F-16 qırıcılarının satışına dair sazişi təsdiqlədikdən sonra Türkiyə və ABŞ ikitərəfli siyasi təmasları, o cümlədən enerji və ticarət sahəsində əməkdaşlığı intensivləşdirir. Gündəliyə yüksək səviyyəli, o cümlədən Türkiyə Prezidenti Rəcəb Tayyib Ərdoğanın ABŞ-yə səfərləri də daxildir. “Hürriyet” qəzeti məlumat yayıb ki, indi tərəflər sövdələşmənin həyata keçirilməsi proseduru ilə bağlı danışıqlara başlayacaq. Xüsusən, üç memorandumun hazırlanması, təyyarələrin çatdırılma tarixlərinin və döyüş təyyarələri üçün modernləşdirmə dəstlərinin, qiymət parametrlərinin müəyyənləşdirilməsi planlaşdırılır. İlkin işlərin nəticələrinə əsasən, Türkiyə ilə ABŞ arasında bütün razılaşmaları birləşdirəcək hökumətlərarası sazişin imzalanması gözlənilir. Ankara və Vaşinqton arasında yenidən etimad fonunda iki ABŞ nümayəndə heyətinin enerji, ilk növbədə bərpa olunan enerji, ticarət sahəsində əməkdaşlıq məsələlərini müzakirə etmək üçün yazda Türkiyəyə səfəri gözlənilir. Bu səfərdə ABŞ-nin 50-yə yaxın ən böyük şirkətinin rəhbərliyinin iştirakı da gözlənilir. Buna cavab olaraq Türkiyədən xarici işlər naziri Hakan Fidanın, ardınca isə Ərdoğanın səfəri planlaşdırılır. Belə bir səfərin Vaşinqtonda NATO sammitinin planlaşdırıldığı iyulda baş tutması mümkündür. Qeyd edək ki, fevralın 11-də ABŞ-nin Ankaradakı səfiri Fleyk Türkiyənin 40 ədəd yeni F-16 və 79 ədəd modernizasiya dəstini almasını Konqresin təsdiqlədiyini açıqlayıb. Türkiyə lideri Ərdoğan bu məlumatı fevralın 12-də təsdiqləyib.
Politoloq Məhəmməd Əsədullazadə "Sherg.az"a deyib ki, Türkiyə-ABŞ əlaqələrində normallaşma prosesi başlayıb: "Türkiyənin İsveçin NATO qəbul edilməsinə razılıq verməsi, Yaxın Şərqdə dəyişən geosiyasi situasiya Vaşinqtonun Ankaraya F-16 təyyarələrin tədarükü müsbət həll edildi.
ABŞ F35 Türkiyəyə satışına icazə vermir. Əsas şərti Ankaranın S-400-lərdən imtina etməsidir. Buna baxmayaraq, Ankara və Vaşinqtonun yaxınlaşması İsrail-Fələstin məsələsində sülhün əldə edilməsinə, Azərbaycana qarşı Vaşinqtonun təzyiq siyasətinin neytrallaşdırılması istiqamətində mühüm amil olacaq. Ümumiyyətlə, Vaşinqton və Ankaranın ortaq məxrəcə gəlməsi regionda yeni bir geosiyasi mərhələnin başlanğıcı olacaq. ABŞ çalışır ki, Yaxın Şərqdə İranla gərginləşən münasibətlər fonunda Türkiyənin dəstəyini alsın. Türkiyə üçün əsas problemlərdən biri məhz şimali Suriyada PKK terror təşkilatından ABŞ dəstəyini geri çəkməsidir. Bu müstəvidə danışıqlar aparılacaq. Amma Vaşinqton Suriyada kürdlərə dəstəkdən geri çəkilməyəcək".
