Uşaq bağçasının direktoru həbs olundu
Bakıda “Moon Kids” uşaq bağçasının təsisçisi və direktoru Havvaxanım Rüstəmova həbs olunub. Bu barədə Baş Prokurorluğun Mətbuat xidməti məlumat yayıb. Hazırda cinayət işi üzrə ibtidai istintaq davam etdirilir. H.Rüstəmova "Moon Kids" uşaq bağçasının təsisçisi və direktorudur.
H.Rüstəmovanın həbs olunması xəbərinə sosial şəbəkələrdə çox ciddi reaksiyalar gəlib. Əksəriyyət bu xəbərə sevindiyini, onun iş axtaran qadınların çarəsizliyindən vicdansızca istifadə edib, pullarını mənimsədiyini dilə gətirib. “Woman blog A.D” qrupunun admini Səbinə xanım da Həvvaxanım Rüstəmova ilə təəssüratlarını yazıb:
“Moon kids” uşaq bağçasında elan olunan vakansiya ilə bağlı rus bölməsində müəllim kimi fəaliyyət göstərmək üçün müraciət etdim. Bağçanın direktoru məni qəbul etdi. Başladı özü, biznesi haqqında danışmağa. Məlum oldu ki, bu şəraiti ona atası yaradıb. Öz-özümə fikirləşdirdim ki, bütün bunların mənə nə dəxli, vakansiya üçün müraciət etmişəm, dərdləşməyə gəlməmişəm ki!?
Nə isə, bir xeyli özünü və bağçanı tərifləyəndən sonra dedi ki, bizdə işləmək üçün xüsusi təlim keçməli və proqram almalısınız. Oradakı dərsləri keçməlisiniz və s.
Lap yaxşı, təlim keçmək daha yaxşıdır deyə düşünməyə başlamışıdım ki, nə desə yaxşıdır: bəs, proqram 5000 manatdır.
Dedim nə qədər? 5000 AZN-ə işçi götürürsünüzsə, vakansiya ilə bağlı elan niyə paylaşmısınız!? Camaatı yalandan dolamısınız, deyib çıxdım.
Daha sonra bir tanış qiz ora dayə kimi getdi. Dedim getmə, oranın yiyəsi fırıldaq adama oxşayır. Eşitmədi, getdi. Ondan da 2500 manat alıb, dayə kimi götürdüb. Həm də 300 AZN maaşla.... Demə, proqram, təlim adı ilə külli miqdarda pul alıb işə götürdüyü insanları bir az işlədib, “siz ləngsiz, bizə uyğun deyilsiz” kimi bəhanələrlə işdən çıxarırmış”.
Qeyd edək ki, “Moon Kids” Məhdud Məsuliyyətli Cəmiyyətində yol verilən qanunsuzluqlarla bağlı Nizami Rayon Prokurorluğunda istintaq edilən cinayət işi üzrə MMC-nin direktoru Rüstəmova Havvaxanım İmamət qızı Cinayət Məcəlləsinin 178.2.2, 178.2.3, 178.2.4 (qulluq mövqeyindən istifadə etməklə təkrarən və xeyli miqdarda dələduzluq) və 308.1-ci (vəzifə səlahiyyətlərindən sui-istifadə) maddələrilə təqsirləndirilən şəxs qismində cəlb edilərək barəsində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs-qətimkan tədbiri seçilib.
Şəymən