Bakıda arvadını öldürən Sabunçu Rayon Məhkəməsinin sabiq hakimi Fəqan Əhmədovun cinayət işi üzrə məhkəmə prosesi başa çatıb.
APA-nın xəbərinə görə, Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən prosesdə dövlət ittihamçısı çıxış edib. Prokuror çıxışında Fəqan Əhmədova verilən ittihamların məhkəmə istintaqı zamanı sübut olunduğunu bildirərərək təqsirləndirilən şəxs Fəqan Əhmədovun 11 il müddətinə azadlıqdan məhrum olunmasını istəyib.
Dövlət ittihamçısının çıxışına münasibət bildirən vəkillər bildirib ki, təqsirləndirilən şəxs dəfələrlə hadisənin ehtiyatsızlıq səbəbindən törədildiyini qeyd edib. Həmçinin müdafiəçilər dövlət ittihamçısının çıxışı ilə razı olmadıqlarını, müvəkkillərinin bu günə qədərki fəaliyyətini və himayəsində azyaşlı övladlarının olduğunu əsas gətirərək məhkəmədən ədalətli hökm çıxarılmasını xahiş ediblər.
Daha sonra məhkəmə təqsirləndirilən şəxsə son söz verib. F.Əhmədov çıxışında verilən ittihamla razı olmadığını bildirib:
“Qəsdən kimisə öldürmək üçün əvvəldən beynində plan qurmalısan. Bu hadisə sadəcə, yersiz və şit bir zarafatın nəticəsi idi. Mən Pərvanəni sevirəm və son nəfəsimə kimi də belə olacaq. Mən heç vaxt onun başından bir tük də əksik olmasını istəməmişəm. Xahiş edirəm ədalətli qərar qəbul edəsiniz”.
Məhkəmə müşavirəyə gedib. Müşavirədən sonra prosesdə hökm oxunub. Hökmə əsasən, Fəqan Əhmədov 10 il azadlıqdan məhrum olunub.
Hökmdə qeyd olunub ki, təqsirləndirilən şəxs cəzasını ciddi rejimli cəzaçəkmə müəssisəsində çəkməlidir. Onun həbs müddəti 2021-ci il may ayının 30-dan hesablanacaq.
Qeyd edək ki, Baş prokurorluğun məlumatına görə, bu il mayın 30-da paytaxt sakini Əhmədova Pərvanə Süleyman qızının qəsdən öldürülməsi faktı ilə bağlı Baş Prokurorluğun İstintaq idarəsində Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanaraq istintaq aparılıb.
İstintaqla Bakı şəhəri Sabunçu rayon Məhkəməsinin hakimi vəzifəsində işləyən Əhmədov Fəqan Rövşən oğlunun 30 may 2021-ci il tarixdə, saat 23 radələrində Bakı şəhəri Sabunçu rayonu, Nardaran qəsəbəsi, “Ləhiş bağları” adlanan yaşayış massivində birgə yaşadıqları evdə şəxsi münasibətlər zəminində aralarında yaranmış mübahisə zamanı özünə məxsus ov tüfəngindən atəş açaraq arvadı Pərvanə Əhmədovanı qəsdən öldürməsinə əsaslı şübhələr müəyyən edilib.
Fəqan Əhmədov Cinayət Məcəlləsinin 120.1-ci (qəsdən adam öldürmə) maddəsi ilə təqsirləndilirən şəxs qismində cəlb edilərək barəsində məhkəmənin qərarı ilə həbs qətimkan tədbiri seçilib.
