Konyada beyninin sol tərəfinə laxtalanma düşən 67 yaşlı Rahmi Kandemir, əməliyyatdan sonra türkcəni unudub. Danimarka dilində danışmağa başlayan yaşlı kişinin vəziyyəti tibbi ədəbiyyatda nadir rast gəlinən hallardan biri kimi qiymətləndirilir.
Sherg.az xəbər verir ki, Danimarkada 20 il yaşadıqdan sonra 10 il əvvəl Konyaya köçən, 7 uşaq atası olan 67 yaşlı Rahmi Karademir, ötən həftə Selçuk Universiteti Tibb Fakültəsi xəstəxanasının Ortopediya şöbəsində dizindən əməliyyat olunub.
Əməliyyatdan iki gün sonra Karademirdə qəfil olaraq sağ qol və ayaqda gücsüzlük (iflic) və nitq pozğunluğu yaranıb və təcili qiymətləndirməyə alınıb.
Aparılan müayinələr zamanı Karademirin beyninin sol tərəfindəki əsas damarlardan birində laxtalanma olduğu və damarın tutulduğu müəyyən olunub.
Təcili anjioqrafiya edilərək laxta təmizlənib. Əməliyyatdan sonra şikayətləri böyük ölçüdə azalan Karademirin Danimarka dilində danışmağa başlaması, xüsusilə başda həyat yoldaşı olmaqla ətrafındakı hər kəsi təəccübləndirib.
Türkcə danışa bilmədiyi üçün təşvişə düşən Karademirin illərdir istifadə etmədiyi dili yenidən danışmağa başlaması mütəxəssislərin də diqqətini çəkib.
Laxtanı təmizləyən Selçuk Universiteti Tibb Fakültəsi xəstəxanasının Neyrologiya Bölməsinin müəllimi Prof. Dr. Gökhan Özdemir əməliyyatdan sonra təəccüblü bir vəziyyətlə qarşılaşdıqlarını bildirib.
“Xəstənin gündəlik həyatında istifadə etdiyi türkcəni danışa bilmədiyini, lakin artıq unutduğunu düşündüyümüz danimarka dilini danışmağa başladığını müşahidə etdik. Bu vəziyyət tibb ədəbiyyatında nadir hallarda rast gəlinən bir nümunədir,” – deyə bildirən Özdemir əlavə edib: “Bir neçə dil bilən şəxslərdə beyin damar tıxanıqlığı və ya qanaxmasından sonra bəzi dillər unudula, əvvəllər istifadə edilməyən dillər isə yenidən ortaya çıxa bilər.”
Özdemir bildirib ki, gələcək dövrdə xəstənin türkcə danışmasının yenidən mümkün olacağını və dil qabiliyyətinin bərpa oluna biləcəyini gözləyirlər.
