Apasport.az saytının məlumatına görə, avqust reytinqində bəzi dəyişikliklər olub.
100 ən yaxşı arasında Azərbaycanın 6 kişi şahmatçısı yer alıb. Millimizin liderləri mövqeyini qoruyub. Şəhriyar Məmmədyarov 2782 xalla 6-cı, Teymur Rəcəbov 2763 xalla 10-cudur.
Mövqeyi dəyişməyən Qədir Hüseynov 72-ci sırada yer alıb – 2665 xal. Millimizdən ayrılmasına baxmayaraq təmsilçimiz kimi göstərilən Arkadi Naydiç 24 pillə irəliləyişə nail olub və 2663 xalla 73-cüdür.
3 addım geriləyərək 87-ci yerə yuvarlanan Nicat Abbasov 2656 xala malikdir. 2 xal geri qalan Rauf Məmmədov 4 pillə geriləyərək 91-cidir.
Cədvələ norveçli Maqnus Karlsen başçılıq edir – 2847 xal. Fabiano Karuana (ABŞ) 2806 xalla ikinci, Dinq Liren (Çin) 2799 xalla üçüncüdür.
Qadın şahmatçılar sırasında isə 3 həmyerlimiz yer alıb. Yığma üzvlərindən Günay Məmmədzadə 2460 xalla 25-ci, Gülnar Məmmədova 2385 xalla 77-ci sırada qalıb. Ondan 9 xal geri olan Xanım Balacayeva 2 pillə irəliləyərək 89-cu olub.
Qadın zəka sahiblərinin cədvəlində Yifan Hou (Çin, 2658) liderliyini qoruyub. Aleksandra Qoryaçkina (Rusiya, 2596) ikinci, Humpi Koneru (Hindistan, 2586) üçüncüdür.
