UEFA Avropa Liqasının qrup mərhələsində V tura start verilib.
"Report"un məlumatına görə, ilk oyun günündə bir qarşılaşma keçirilib.
C qrupunda Rusiyanın "Spartak" (Moskva) klubu İtaliya "Napoli"sini qəbul edib. Görüş meydan sahiblərinin 2:1 hesablı qələbəsi ilə başa çatıb.
Matçda hesab erkən qolla açılıb. Moskva təmsilçisinin heyətində Aleksandr Sobolev 3-cü dəqiqədə penaltini dəqiq yerinə yetirib. 24 yaşlı hücumçu 28-ci dəqiqədə özünün və komandasının ikinci qolunu vurub. 64-cü dəqiqədə qonaqlar Elif Elmasın qolu ilə fərqi azaltsa da, məğlubiyyətdən qaça bilməyib.
Bu qələbədən sonra xallarını 7-yə çatdıran "Spartak" liderliyə yüksəlib. Eyni xala malik "Napoli" isə 2-ci pilləyə geriləyib.
Qeyd edək ki, bu qrupun digər oyununda Azərbaycan millisinin hücumçusu Mahir Emrelinin çıxış etdiyi Polşa "Legiya" İngiltərədə "Lester"in qonağı olacaq. Noyabrın 26-da oynanılacaq qarşılaşma Bakı vaxtı ilə saat 00:00-da başlayacaq. Hazırda Varşava klubu 6 xalla 3-cüdür. 5 xalı olan Premyer Liqa təmsilçisi isə sonuncudur.
