Daha əvvəl Avropa Komissiyasının (AK) rəhbəri Ursula fon der Lyayenə qarşı etimadsızlıq səsverməsi təşəbbüsü ilə çıxış edən rumıniyalı deputat Georq Piperey Lyayeni ona böhtan atdığı iddiası ilə məhkəməyə verib. Buna səbəb AK rəhbərinin onun Rusiyanın əmrlərinə əməl etdiyinə eyham vurması olub.
Oxu.Az-ın xəbərinə görə, bu barədə "Politico" nəşri məlumat verib.
Nəşr bildirib ki, Lyayeni məhkəməyə verən sağçı "Avropa mühafizəkarları və islahatçıları" qrupunun nümayəndəsinə görə, Avropa Komissiyasının sədri COVID-19 peyvəndlərinin satın alınmasında korrupsiya ittihamları ilə bağlı etimadsızlıq səsverməsinə dair müzakirələr zamanı ona "şəxsən hücum etmək" qərarına gəlib.
Rumıniyalı deputat fon der Lyayenin açıqlamalarına görə şəxsən özündən üzr istəməsini tələb edir. Məhkəmə instansiyası hələ ki iddianın məqbul olub-olmaması ilə bağlı qərar verməyib.
