"İslamofobiyaya həsr olunmuş üçüncü beynəlxalq konfransdır. Burada alimlər, dini liderlər, siyasətçilər, iqtisadçılar bir araya gəlir. Bu tədbir dünyada dialoqun vacibliyini vurğulamalıdır".
Bunu Sherg.az-a açıqlamasında Roma-Katolik Kilsəsinin Azərbaycandakı ordinarisi, yepiskop Vladimir Fekete Bakıda keçirilən “İslamofobiya: Qərəzin ifşa olunması və stiqmaların dağıdılması” mövzusunda beynəlxalq elmi konfransın əhəmiyyətini şərh edərkən bildirib.
V.Fekete onu da əlavə edib ki, insanlar arasında dini ayrı-seçkilik meyllərinin güclənməsi bəşəriyyətə heç bir şəkildə fayda verməyəcək:
"Çünki hər kəs yalnız öz qrupuna qapanır və "mən müsəlmanam və bu pis xristianlarla və ya yəhudilərlə heç bir əlaqə qurmaq istəmirəm" və ya əksinə, "mən yəhudiyəm və heç kimi qəbul etmirəm" deyirsə, bu vəziyyət heç kimə fayda verməyəcək. Bugünkü tədbirdə yalnız müsəlmanlar deyil, həm də xristianlar və yəhudilər iştirak edərək, mövcud çətinliklərin müzakirəsini aparır və təcrübələrini bölüşürlərsə, bu, təkcə məlumatın kifayət etmədiyini, informasiya mübadiləsi və dialoqun əhəmiyyətini göstərən mühüm bir nümunədir.”
O eyni zamanda Azərbaycanda yaşadığı 15 il ərzində burada daim dini liderlər və sadə insanlar arasında dialoqun varlığını müşahidə etdiyini söyləyib:
Vladimir Feketenin sözlərinə görə, qarşılıqlı hörmət və dialoq olduqda, Allah çıxış yolu göstərir, çünki islamofobiyadan əlavə, dünyada antisemitizm və xristianofobiya da mövcuddur:
“Bu onu deməyə əsas verir ki, əgər insanlar bir-birindən qorxmursa, əksinə, qarşılıqlı hörmət və dialoq varsa, Allah bizə çıxış yolu göstərəcək. Konfrans islamofobiyaya həsr olunub, lakin heç kimə sirr deyil ki, dünyada həm də antisemitizm və xristianofobiya mövcuddur. Fransada və digər xristian ölkələrində xristianlara qarşı təzyiqlər müşahidə olunur. Bu baxımdan, əgər biz burada – müsəlmanlar, xristianlar və yəhudilər – bir araya gəlib islamofobiya, antisemitizm və xristianofobiya kimi təzahürləri birlikdə müzakirə edə bilsək, inşallah bu vəziyyətdən bir çıxış yolu tapa bilərik. İnsanlar anlamalıdırlar ki, əgər biz eyni torpaqda bir-birimizə hörmət edə biliriksə, bir-birimizin uğurlarını qiymətləndirə biliriksə, bu, gələcəyə aparan yoldur”.
