Milli Məclisin İqtisadi siyasət, sənaye və sahibkarlıq komitəsinin "Dövlət suverenliyinin iqtisadi əsasları və iqtisadi müstəqillik" mövzusuna həsr edilən konfransı keçirilib. İclasda çıxış edən millət vəkili Ziyad Səmədzadə deyib ki, Azərbaycan iqtisadiyyatı inkişaf mərhələsindədir. Deputat bildirib ki, 1994-cü ildə "Əsrin müqaviləsi" imzalanmasaydı, bu gün iqtisadi müstəqillikdən, inkişafdan və torpaqlarımızın azadlığından danışa bilməzdik:
"1995-1996-cı ildə ölkəmizdə özəlləşmə siyasəti həyata keçiriləndə bəziləri deyirdi ki, gəlin, hər şeyi özəlləşdirək, dağıdaq. Amma o vaxt bunun qarşısını ala bildik. Çünki elə sahələr var ki, onun özəlləşdirilməsinə yol vermək olmaz". Z.Səmədzadə hesab edir ki, Azərbaycanda neft sənayesinin özəlləşdirilməsinə heç vaxt imkan verilə bilməz: "Bəzən iqtisadiyyatda liberallaşmadan danışılır. Amma liberallaşma dövlətin iqtisadi müstəqilliyinə ziyan vurur. Çünki liberallaşma laqeydlikdir. Biz isə idxalı və daxili bazarı qorumalıyıq".
Millət vəkilinin açıqlamasını Sherg.az-a şərh edən Neft Araşdırmaları Mərkəzinin rəhbəri, iqtisadçı-ekspert İlham Şaban deyib ki, 1920-ci il mayın 2-də Azərbaycan neft sənayesi milliləşdirilib. Ekspert vurğulayıb ki, 1995-ci ilin yanvar ayının sonunda Azərbaycanın neft sənayesində ilk dövlətsizləşdirmə prosesi baş verib:
"Azərbaycan Beynəlxalq Əməliyyat Şirkəti, "Azəri-Çıraq-Günəşli"nin idarə olunması üzrə konsorsium yaradılıb. Bu, özəl təşkilatdır və indiyə qədər dövlətə bağlı şirkət kimi qəbul edilməyib. Hazırda Azərbaycanda neft hasilatı ilə məşğul olan 14 qeyri-dövlət strukturu var. Bir şirkət, söhbət "GL" şirkətindən gedir, tamamilə Azərbaycanda yaradılmış və MMC statusunda olan özəl şirkətdir. Yüz faiz Azərbaycan kapitalı olan bir şirkətdir. Bunun dövlətçiliyimizə, iqtisadi təhlükəsizliyimizə hansısa təhdidini görmürəm. Ola bilər, Ziyad müəllim bunu Dövlət Neft Şirkəti ilə bağlı deyib. Azərbaycan Dövlət Neft Şirkəti dövlətin enerji, yəni neft-qaz sektorunda maraqlarını rəsmi şəkildə təmin edən bir qurumdur. Amma mən faktlardan danışıram".
