Azərbaycan Mərkəzi Bankının (AMB) sədri Taleh Kazımov İsveçrə Milli Bankının sədri Martin Şlegel ilə görüşüb.
Bunu AMB sədri Taleh Kazımov "X" sosial şəbəkəsindəki hesabında bildirib.
“İsveçrə Milli Bankının sədri cənab Martin Şlegel ilə Azərbaycana ilk işgüzar səfərində görüşməkdən məmnun olduq.
Görüş zamanı qlobal iqtisadiyyat və maliyyə bazarlarında gedən proseslər, ortamüddətli dövr üçün pul siyasəti və maliyyə sabitliyi üzrə prioritetlər, eləcə də maliyyə sektorunun inkişafına dair rəqəmsal təşəbbüslər ətrafında geniş fikir mübadiləsi apardıq.
Görüşdə həmçinin ölkələr arasında tərəfdaşlığın cari vəziyyətindən məmnunluq ifadə edərək qurumlar arasında əməkdaşlığın genişləndirilməsi imkanlarını müzakirə etdik”-paylaşımda qeyd edilib.
Millət vəkili Vüqar Bayramov “Sherg.az”a söyləyib ki, Azərbaycanda rəqəmsal ödəniş sisteminin və müvafiq infrastrukturun genişləndirilməsi prioritet istiqamətlərdən biridir:
“Bu sahədə xidmətlərin genişlənməsi, eyni zamanda, bank sektorunda yeni maliyyə məhsullarının formalaşdırılması və təqdim olunması üçün əlverişli şərait yaradır. Azərbaycan üçün inkişaf etmiş ölkələrlə, xüsusən də bu sahədə qabaqcıl təcrübəyə malik olan İsveçrə ilə əməkdaşlığın gücləndirilməsi strateji əhəmiyyət daşıyır.
İsveçrənin rəqəmsal maliyyə texnologiyaları sahəsində üstün mövqeyə malik olması Azərbaycanın bu sahədə potensial imkanlardan və qabaqcıl təcrübədən faydalanmasına şərait yaradır. Bu kontekstdə bank sektorunda yeni məhsulların tətbiqi ilə yanaşı, xüsusilə son dövrlərdə aktuallıq qazanan kiber dələduzluq halları ilə mübarizənin gücləndirilməsi baxımından da bu cür əməkdaşlıq əhəmiyyətlidir. Nəticə etibarilə, beynəlxalq əməkdaşlıq bank sektorunda innovativ məhsullardan səmərəli istifadənin təmin olunmasına və maliyyə sistemində təhlükəsizlik səviyyəsinin yüksəldilməsinə töhfə verə bilər”.
