Bir gecə yuxuya gedib gözlərinizi açdığınızda aradan onilliklərin keçdiyini təsəvvür edin. Bu, nağıl kimi səslənsə də, İsveçli Karolina Olssonun hekayəsi illərdir dünyanın ən müəmmalı hadisələrindən biri kimi göstərilir.
Sherg.az xəbər verir ki, hələ 14 yaşında olarkən dərin yuxuya getdiyi iddia edilən Karolina’nın 32 il sonra oyandığı bildirilir. Bu hadisə tibb tarixində xüsusi maraq doğurduğu üçün Karolina Olsson “real həyatda Yatmış Gözəl” kimi də adlandırılır. Hadisənin üzərindən yüz ildən çox vaxt keçsə də, mütəxəssislər hələ də bunun səbəbi ilə bağlı dəqiq nəticəyə gələ bilməyiblər. Bəziləri bunu nadir nevroloji hal, bəziləri isə psixoloji vəziyyət kimi qiymətləndirir.
Karolina Olsson 29 oktyabr 1861-ci ildə İsveçin şərq sahilində yerləşən Oknö adası yaxınlığında dünyaya gəlib. Sakit və sadə ailə həyatı olub. Beş uşaqlı ailənin yeganə qızı idi. Qardaşları məktəbə gedərkən o ev işlərində anasına kömək edirdi. Kiçik yaşlarından öyrənməyə böyük maraq göstərdiyi və oxuma-yazma öyrənmək istədiyi deyilir.
Ailəsindən məktəbə göndərilməsini xahiş etdiyi, uzun müddət israr etdikdən sonra bu istəyinin qəbul olunduğu qeyd edilir. O dövrdə kənd bölgələrində qız uşaqlarının təhsilə çıxışı məhdud idi, buna görə Karolinanın təhsil arzusu diqqət çəkmişdi.
1876-cı il 18 fevralda onun həyatını dəyişən hadisənin baş verdiyi bildirilir. Qışın soyuq günündə məktəbdən evə qayıdarkən buzlu su yolunda sürüşərək yıxıldığı, başını vurduğu və bədənində zədələr aldığı qeyd olunur. Ailəsi bunu adi qəza kimi qəbul etmişdi.
Həmin gecə şiddətli baş ağrısından şikayət edən Karolina yatağa uzanır və bundan sonra dərin yuxu halına düşür. Onu oyatmağa çalışan ailə heç bir nəticə əldə edə bilmir. Əvvəlcə müvəqqəti hal hesab edilən vəziyyət günlər, sonra həftələr davam etdikcə qəribə hal alır. Ailəsi onun nəfəs aldığını, bəzən yüngül hərəkətlər etdiyini, lakin oyanmadığını bildirir.
Hadisə qısa zamanda bölgədə yayılır. Həkimlər çağırılır, onun komaya bənzər vəziyyətdə ola biləcəyi ehtimal edilir. Lakin o dövrün tibbi imkanları məhdud idi və dəqiq diaqnoz qoymaq mümkün olmur.
İsveçin müxtəlif bölgələrindən gələn həkimlər hadisəni araşdırır, lakin nəticə əldə edilmir. Karolina yalnız yuxuda olan biri kimi görünürdü. İllər keçdikcə bu hadisə sirr halına gəlir.
Bəzi iddialara görə o, bəzən səslər çıxarır, hərəkət edir, lakin tam şüurlu olmurdu. 1904-cü ildə anasının ölümü onun qayğısına ən çox qalan şəxsin itirilməsi kimi qeyd edilir.
1908-ci il 3 aprel tarixində isə xidmətçi onun otağından səs gəldiyini eşidir və Karolinanı oyanmış vəziyyətdə tapır. Lakin o, zəif idi və ətrafını tanımırdı. Yalnız uşaqlıq xatirələrini xatırladığı deyilir.
Sonradan Stokholmda həkimlər tərəfindən müayinə edilən Karolinanın fiziki olaraq nisbətən yaxşı vəziyyətdə olduğu, bəzi əsas bacarıqları yenidən öyrəndiyi bildirilir. Bu halın dissosiativ pozuntu və ya katatoniya kimi vəziyyətlərlə əlaqəli ola biləcəyi ehtimal edilir. Lakin dəqiq nəticə yoxdur.
Karolina daha sonra sakit həyat sürür və 1950-ci ildə 88 yaşında vəfat edir. O, arxasında hələ də cavabsız qalan bir sirr buraxır.
