Balıkəsir Universitetinin şəhərciyindəki "Səbir çiçəyi" 20 ildən sonra ilk dəfə çiçək açıb və bununla da, ömrünü başa vurub.
“Sherg.az” “Milliyet.com.tr”yə istinadən xəbər verir ki, Botanika bağındakı "Səbir çiçəyi" (elmi adı Aqave bitkisi) - 20 ildən sonra çiçək açıb. “Səbir bitkisi” kimi də tanınan Aqave bitkisi yalnız bircə dəfə çiçək açır. Ətrafda isə kiçik pöhrələr əmələ gəlir. “Səbir çiçəyi” Balıkəsir Universitetinin Elm və İncəsənət fakültəsinin bağçasında olub. Botanika üzrə mütəxəssis professor Fatih Satıl açıqlamasında aqava bitkisi haqqında məlumat verərək izah edib ki, Mərkəzi və Cənubi Amerikaya mənsub olan Aqave bitkisi haqqında yüz il yaşadığına və əsrdə bir dəfə çiçək açdığına dair ümumi bir yanlış fikir var: “Buna görə də bu bitki bəzən əsr çiçəyi olaraq da tanınır. Əslində, Aqave bitkisi orta hesabla 10-30 il yaşayır. Bitki ömründə yalnız bir dəfə çiçək açır. 7,5 metrə qədər böyüyən bu bitkinin yarpaqları ətli və sərtdir. Ölkəmizdə Aralıq dənizi iqlimi olan ərazilərdə park və bağlarda bəzək bitkisi kimi də istifadə olunur. Son vaxtlar havaların isti keçməsi bu bölgədə də bitkinin çiçəklənməsinə səbəb olub. Bitki təxminən 20 il əvvəl FEF bağında abadlıq işləri zamanı əkilmişdi. Bu il çiçək açdı və öldü. Maraqlıdır ki, bitki ətrafında xeyli sayda pöhrələr qoyur. Onların böyüyüb çiçəkləməsi üçünsə illər keçməlidir”.
