Danışma qabiliyyətini itirmiş bir insan beyin implantı vasitəsilə düşüncələrini səsə çevirərək həyat yoldaşına “Səni sevirəm” deyib.
Sherg.az xəbər verir ki, İlon Maskın rəhbərlik etdiyi “Neuralink” şirkətinin klinik tədqiqat iştirakçısı olan xəstə süni intellekt texnologiyası ilə işləyən beyin-kompüter interfeysindən istifadə edib. Hadisənin videosu sosial şəbəkələrdə böyük maraq doğurub.
Şirkətin paylaşdığı görüntülərdə xəstənin düşüncələrinin nitqə çevrildiyi və bunun sayəsində partnyoru ilə yüksək səslə ünsiyyət qura bildiyi görünür.
Beyin implantı necə işləyir?
Beyin-kompüter interfeysi beyində yaranan elektrik siqnallarını cihaz tərəfindən qəbul edilən əmrlərə çevirir. Texnologiyanın iflic, görmə və eşitmə problemləri yaşayan insanların müəyyən funksiyalarını bərpa etməsinə kömək etməsi nəzərdə tutulur.
“Neuralink” bu ilin əvvəlində klinik tədqiqatlara 21 iştirakçının cəlb edildiyini açıqlamışdı. Şirkətin ilk xəstələrindən biri isə implant vasitəsilə kompüterdə kursoru hərəkət etdirib, internetdən istifadə edib və video oyunları oynayıb.
Beyin-kompüter interfeysləri üzrə tədqiqatlar uzun illərdir davam etsə də, texnologiya hələ inkişaf mərhələsindədir və implant yerləşdirilən insanların sayı dünya üzrə yüzlərlə ölçülür.
