Aydın Quliyev: “Sözügedən artım bütün media seqmentlərinə eyni qaydada şamil edilməlidir”
2024-cü ildə Azərbaycanda kütləvi informasiya vasitələrinin, o cümlədən “Azərbaycan Televiziya və Radio Verilişləri” QSC-nin, İctimai Televiziya və Radio Yayımları Şirkətinin, “Mir” Dövlətlərarası Teleradio Şirkəti Azərbaycan Milli Nümayəndəliyinin fəaliyyətinin təmin olunması məqsədilə 64,9 milyon manat maliyyə yardımı (subsidiya) nəzərdə tutulur.
Bu barədə Maliyyə Nazirliyinin məlumatında bildirilib. Məlumata görə, bu, 2023-cü ilin təsdiq olunmuş proqnozu ilə müqayisədə 11,2 faiz çoxdur. Artım əsasən AzTV-nin vergi öhdəlikləri üzrə xərclərlə bağlıdır.
“Bakı-xəbər” qəzetinin baş redaktoru Aydın Quliyev isə “Sherg.az ”a açıqlamasında Kütləvi İnformasiya Vasitələrinə ayrılan subsidiyanın 11 faiz artırılmasının təqdirəlayiq hal olduğunu deyib:
“Vətəndaşların informasiya təhlükəsizliyinin yaxşılaşdırılması üçün KİV-ə olan tələbat ilbəil artdığına görə media sahəsinə dövlət dəstəyi də hər il artmalıdır. Bu bir növ tendensiya halını almalıdır. Subsidiyanın artırılmasını alqışlayıram, lakin ayrılan vəsaitin nə qədər yetərli olub-olmayacağı ilə bağlı fikir söyləməkdə çətinlik çəkirəm. Lakin sözügedən artım bütün media seqmentlərinə eyni qaydada şamil edilməlidir. 10 faiz artım həm onlayn, həm çap mediasına, həm də audivizual KİV-ə şamil edilməlidir. Bu artımdan hansısa media seqmentinin daha çox faydalanıb, digərlərinin kənarda qalması düzgün olmazdı. Cəmiyyətin informasiya təminatı sahəsindəki fəaliyyətlərini yeniləyə və gücləndirə bilsinlər”.
