Laçın dəhlizində xidmət aparan rus sülhməramlıları Azərbaycanın Qarabağ bölgəsində yaşayan erməni qadınları 8 Mart – Beynəlxalq Qadınlar Günü münasibəti ilə təbrik ediblər. Bu barədə Rusiya Müdafiə Nazirliyi məlumat yayıb. Bildirilib ki, sülhməramlılar buraxılış məntəqəsində avtomobilləri saxlayaraq, qadınlara gül veriblər.
Sülhməramlıların heç də neytral olmadıqlarını, açıq-aydın tərəf tutduqlarını ilk gündən etibarən bilirik. Hətta bunu nümayiş etdirməkdən də çəkinmirlər. Yaxşı, görəsən, indiki provokasiya son həddirmi? Yoxsa, yenə “oyunlar” olacaq? Atalar demiş, “ayının min oyunu bir armudun başındadır...”
Milli Dirçəliş Hərəkatı Partiyasının sədri, keçmiş millət vəkili Fərəc Quliyev sözügedən təxribatla bağlı fikirlərini “Sherg.az”la bölüşdü. O, bu cür halların “ənənəvi” xarakteri daşıdığını bildirdi:
“İstər çar, istərsə də bolşevik rejimi dövründə rusların ermənilərə sevgisi göz qabağında olub. Rusiya Ermənistana həmişə quberniya kimi baxıb. Beləliklə, bölgədə maraqlarını təmin edib. Bilirsiniz ki, üçtərəfli bəyanatın şərtlərinə uyğun olaraq azərbaycanlı əhali öz dədə-baba torpaqlarına qayıtmalı idi. Lakin BMT-nin həmin missiyasını mənimsəyən rus sülhməramlılar bu tələbi yerinə yetirmədilər. Onlar düşmənlərin rəğbətini qazanaraq öz istəklərini həyata keçirməklə məşğuldurlar”.
F.Quliyev, həmçinin bildirdi ki, təxribatlar nəticəsiz qalacaq:
“Müxtəlif motivasiyalar, o cümlədən süni yolla demoqrafik vəziyyəti dəyişmək “hədəfə dəyməyəcək”. Bizim dəmir iradəmiz ortadadır. Prezident İlham Əliyev də sülhməramlıların Qarabağda müvəqqəti xarakter daşıdığını müsahibələrində dəfələrlə xatırladıb. Yəni ruslar nə qədər çalışsalar da, öz missiyalarından kənar hərəkət edə, nəyəsə nail ola bilməzlər. Onların bir dövlət kimi bizi özümüzdən çıxarmaq səyləri effekt verməyəcək. Azərbaycan “biləyi” ilə qazandığı qələbəni diplomatik yolla sona çatdıracaq. Yarımçıq qalan problemlər də bizim xeyrimizə həllini tapacaq”.
