İmamoğlu seçkiyə gedə bilməsə, əmanətçi namizəd kimi Mansur Yavaş namizəd göstəriləcək
Türkiyədə ana müxalifət partiyasının - Cümhuriyyət Xalq Partiyasının 21-ci növbədənkənar qurultayı keçirilib. Qurultay Ankarada Nazim Hikmət Mədəniyyət Mərkəzində təşkil edilib. Qurultayda partiyanın prezidentliyə namizədi, hazırda həbsdə olan Əkrəm İmamoğlu üçün təmsili stul ayrılıb. Özgür Özəl 1 171 səslə yenidən partiyanın rəhbəri seçilib. Qeyd edək ki, ana müxalifət partiyasının növbədənkənar qurultayında sədr postuna yeganə namizəd hazırkı sədr Özgür Özəl olub. Sabiq millət vəkili Berhan Şimşek yetərli imza toplaya bilmədiyi üçün namizəd olmayıb. Bundan əvvəl isə Antalyanın Muratpaşa rayonunun bələdiyyə sədri Ümit Uysal namizədliyini geri götürmüşdü. Qurultay əsnasında Berhan Şimşeklə Özgür Özəl arasında münaqişə yaşanıb. Şimşek namizədliyinin qeydə alınmamasına görə partiya rəhbərliyini ittiham edib. Xatırladaq ki, sabiq sədr Kamal Kılıçdaroğlunun da namizədliyini irəli sürəcəyi gözləntiləri var idi. Lakin K.Kılıçdaroğlu açıqlama verərək belə bir niyyətinin olmadığını söyləmişdi.
Politoloq Zeynal Əmrəliyev "Sherg.az"a deyib ki, Özgür Özəlin yenidən CHP sədri seçiləcəyi məlum idi. Ekspertin sözlərinə görə, qurultay sadəcə hakim AKP hökumətinin CHP-yə qəyyum təyin etmə riskinin qarşısını almaq üçün çağırılmışdı:
"Kiminsə Özəli sədrlikdən uzaqlaşdırmaq kimi bir planı yox idi. İndiki dönəmdə heç kim belə bir prosesə baş qoşmazdı. Türkiyə siyasətini dərindən analiz edən hər kəs yaxşı bilir ki, Kamal Kılıçdaroğlu artıq CHP-nin başına dönə bilməz. Kılıçdaroğlu kifayət qədər nüfuz itirib, bunu özü də bildiyi halda sədrliyə namizəd olmazdı. Qaldı ki, Ə.İmamoğluna, onun əsas niyyəti Türkiyə Cümhuriyyəti prezidenti olmaqdır. Ə.İmamoğlu partiya sədrliyinə prezident olduqdan sonra iddia edə bilər. Özü də yaxşı bilir ki, onun partiya rəhbərliyinə iddiası prezidentlik yolunu kəsə bilər. Özəl də fərqindədir ki, indən sonra prezidentliyə gedə bilməz".
Analitik vurğulayıb ki, CHP-nin prezidentliyə namizədi İmamoğludur:
"Onun qarşısını kəsmək təşəbbüsü ciddi problemə yol aça bilər. Bu, İmamoğlunu sədrlik kreslosundan da edə bilər. Nəzərə alaq ki, digər güclü alternativ Ankara bələdiyyə Mansur Yavaşdır. Ehtimal ki, İmamoğlu seçkiyə gedə bilməsə, əmanətçi namizəd kimi Mansur Yavaş namizəd göstəriləcək. Özgür Özəlin nə yaşı, nə də siyasi vəziyyəti onun əmanətçi namizəd olmasına imkan verir".
