ABŞ Ermənistanı Azərbaycanla sülh sazişinə razı salmaq üçün ölkəyə NVIDIA çiplərinin satışına dair imkanları genişləndirib.
Sherg.az xəbər verir ki, bu barədə The Wall Street Journal danışıqlarda iştirak edən mənbələrə istinadən məlumat yayıb.
Nəşrin məlumatına görə, İrəvan üçün əsas təşviqlərdən biri Razdanda yaradılan Firebird məlumat mərkəzi üçün NVIDIA çiplərinin alınmasına verilən əlavə icazələr olub. Layihə çərçivəsində gələn ilin sonunadək mərkəzdə 70 min yeni nəsil süni intellekt serverinin yerləşdirilməsi planlaşdırılır.
ABŞ-ın Ermənistandakı keçmiş səfiri Kristina Kvin də NVIDIA-nın bu prosesdə mühüm rol oynadığını bildirib.
Qeyd edək ki, 8 avqust 2025-ci ildə Vaşinqtonda Azərbaycan, Ermənistan və ABŞ liderləri sülh nizamlanmasına dair birgə deklarasiya imzalayıblar. Sənədə əsasən, Ermənistan ərazisindən Naxçıvana quru bağlantısının yaradılması nəzərdə tutulur.
