Gürcüstanda C5 kateqoriyalı yeni adi viza tətbiq oluna bilər.
24News.ge xəbər verir ki, bu məqsədlə “Əcnəbilərin və vətəndaşlığı olmayan şəxslərin hüquqi statusu haqqında” Qanuna müvafiq dəyişikliklər ediləcək.
Layihəyə əsasən, bu kateqoriyadan olan viza 5 illik etibarlılıq müddəti və Gürcüstanda 1 illik qalma müddəti üçün veriləcək.
C5 kateqoriyalı adi viza Gürcüstana qısamüddətli məqsədlərlə gələn, bu ölkəyə turist məqsədilə daxil olan və respublika ərazisindən kənarda fəaliyyət göstərən qeyri-rezident şəxslə əlaqəli olduqda, yalnız qeyri-rezident şəxsin xeyrinə fəaliyyət göstərmək hüququna malik olan şəxsə verilir. Bu kateqoriyalı viza, həmçinin şəxsin həyat yoldaşına və yetkinlik yaşına çatmayan uşaqlarına da verilir.
Gürcüstan vizası üçün müraciətin işlənməsi üçün rüsum ən azı 20 ABŞ dolları və ən çoxu 500 ABŞ dolları məbləğində müəyyən edilib.
Qeyd edək ki, qanun layihəsi hakim "Gürcü Arzusu-Demokratik Gürcüstan” partiyasının deputatları tərəfindən hazırlanıb və artıq parlamentdə müzakirəyə çıxarılıb.
