İran ordusu ABŞ hərbi qulluqçularının Yaxın Şərqdəki bazalarda fəaliyyət məlumatlarını toplamaq üçün "Strava" təlim tətbiqinin ictimaiyyətə açıq məlumatlarından istifadə edə bilər.
"Report" xəbər verir ki, bu barədə "Sky News" telekanalı məlumat yayıb.
Məlumata görə, Amerika hərbçiləri fiziki hazırlıq məlumatlarını öz adları ilə yerləşdirir və bu da düşmənlərə hava bazalarındakı gündəlik iş rejimi, yerləşdirmə və hərəkət qaydası haqqında məlumat toplamağa imkan verib.
Telekanal aşkar edib ki, münaqişənin yenidən başlamasından qısa müddət əvvəl İordaniyadakı Müvəffəq əl-Salti Hava Bazasındakı Amerika hərbçiləri qaçışlarını eyni yerdə, ehtimal ki, bir kazarmanın yerləşdiyi yerdə başa vurublar. İyulun 18-də İran həmin kazarmaya zərbə endirib.
"Sky News" vurğulayıb ki, dünya üzrə hərbi qulluqçular hərbi obyektlərin yeri haqqında məxfi məlumatları bilmədən açıqlaya bilərlər; oxşar hallar Kipr və İsraildə də aşkar edilib. Daha əvvəl "Le Monde" qəzeti "Şarl de Qoll" təyyarədaşıyan gəmisinin dəqiq yerinin ictimaiyyətə məlum olduğunu, belə ki, heyət üzvünün qaçış zamanı "Strava" tətbiqindən istifadə etdiyini bildirib. Gəminin Kiprin şimal-qərbində, Türkiyə sahillərindən təxminən 100 kilometr aralıda yerləşdiyi bildirilir.
