Koronavirus zəifləmək bilmir, öldürücülük qabiliyyəti, daha da artır
"Artıq diqqətimizi koronavirusa yönəltməliyik, bütün əhalimizi qorumalıyıq. Ölənlər arasında çox dəyərli insanlar görürük"
Artıq 11-ci aydır ki, dünya gözəgörünməz "taclı” düşmənlə, kiçicik bir virusla ölüm-qalım savaşı aparır. Bu savaşın nə vaxt bitəcəyini hələlik heç kəs bilmir. Virusa yoluxanların, həyatını itirənlərin sayı günbəgün artır, rəqəmlər saatbasaat dəyişir.
Digər ölkələrlə müqayisədə Azərbaycanda koronavirusa yoluxma və ölüm halları azdır. Bu isə ölkəmizin qlobal pandemiyanın öhdəsindən bacarıqla gəldiyini aydın göstərir. Məhz dövlət tərəfindən vaxtında atılan mühüm addımlar, məhdudlaşdırıcı tədbirlər, karantin rejiminin tətbiqi ölkədə koronavirusa kütləvi yoluxma hallarının qarşısını alıb. Lakin son həftələr infeksiyaya gündəlik yoluxma hallarında nəzərəçarpan artım narahatlıq doğurmağa başlayıb.
Həkim Şahin Məmmədov deyir ki, bu gün ölkəmizdə "Covid -19" a yoluxma rekord həddədir. Həkim bildirib ki, proqnozlarımızın əksinə olaraq koronavirus heç də zəifləmək bilmir:
"Hətta onun öldürücülük qabiliyyətində belə azalma yoxdur. Görünür, bir müddət də gözləməliyik. Artıq insanların özünü qoruması da xeyli çətinləşib. Çünki qıraqdan xəstə kimi görünməyən daşıyıcıların da sayı həddən artıq çoxalıb. İctimai nəqliyyatda sıxlığın yüksək səviyyədə olması yoluxmanı artırır".
Həkim qeyd edib ki, artıq bütün diqqətimizi və gücümüzü koronavirusa yönəltməliyik: "Zəng edən insanlar tibbi yardım məsələləri ilə bağlı çox şikayətlər edir.
Fikrimcə, artıq diqqətimizi koronavirusa yönəltməliyik, bütün əhalimizi qorumalıyıq. Ölənlər arasında çox dəyərli insanlar görürük. Hansı ki ani, təsadüfi yoluxmaya qurban gedirlər.
Ölüm sayının 20-dən çox olmasını sanki görməzdən gəlirik. Belə olmaz! Üzü qışa gedir, təcili effektiv tədbirlər görülməlidir".
