Tibdə bir ilk: Gözköçürmə əməliyyatı 

Tibb tarixində ilk dəfə bir insana tam göz transplantasiyası gerçəkləşib. “Sherg.az” “NTV,com.tr”yə istinadən bildirir ki, əməliyyat ABŞ-nin Nyu-York Universitetinin cərrahları tərəfindən aparılıb. İşdə keçirdiyi qəza nəticəsində sol gözünü itirən 46 yaşlı Aoron Ceyms həkimlərin uğurlu əməliyyatından sonra yenidən görməyə başlayıb. Aoron Ceyms iş yerində 7 min 200 voltluq elektrik cərəyanının vurması nəticəsində görmə qabiliyyətini itirib, üz sinirləri də zədələnib. Sözügedən gözköçürmə əməliyyatı bu ilin may ayında baş tutub. Lakin həkimlər bir müddət gözləməyi, əməliyyatın hər hansı fəsadlarının olmayacağından əmin olduqdan sonra məlumatı açıqlamağı qərara alıblar. Artıq əməliyyatdan 6 ay keçir və Aoron normal görmə qabiliyyətinə malikdir. Gözköçürmə əməliyyatı 21 saat çəkib və əməliyyatda 140-dan çox tibb işçisi iştirak edib. Əməliyyatın gedişində gözün köçürülməsiylə yanaşı gözün sinir yenilənməsini gücləndirmək üçün ilk dəfə bir donorun iliyindən alınmış yetişmiş kök hüceyrə də transplantasiya edilib. Aoronun üzünün sol tərəfinə də yeni üz dərisi köçürülüb. Bununla da Aoron Ceyms tibb tarixində ilk dəfə göz transplantasiyası gerçəkləşmiş şəxs olaraq tarixə düşüb. Əməliyyatı gerçəkləşdirənlərdən biri, üz nəqli proqramlarının icraçısı həkim-cərrah Eduardo D. Rodrigez Ceymsin görmə qabiliyyətini bütünlüklə yenidən əldə etməsi ehtimalının az olmasına rəğmən əməliyyatın tibb tarixində iz qoyduğunu söyləyib.