Türkiyənin İzmir şəhərinin Bayraklı rayonunda bir evdən gələn pis qoxu və itlərin hürmə səsləri səbəbindən sakinlər 3 sentyabrda vəziyyəti Rayon Kənd Təsərrüfatı İdarəsinə və Heyvan Hüquqları Federasiyası (HAYTAP) əməkdaşlarına bildiriblər.
Sherg.az türk mediasına istinadən xəbər verir ki, şikayət əsasında ünvanı yoxlayan qruplar evdə müxtəlif cinslərdən olan ümumilikdə 20 itin saxlandığını aşkar ediblər. Heyvanlar əməkdaşlar tərəfindən təhvil alınıb. Bayraklı Kənd Təsərrüfatı İdarəsinin əməkdaşları evdə yaşayan İlknur Ç.-yə 830 min 880 TL məbləğində inzibati cərimə kəsib.
HAYTAP sədr müavini, vəkil Senem Demirel Acar bildirib: “Biz bu evə üçüncü dəfə basqın etdik. Həmin şəxs itləri qeyri-sağlam şəraitdə saxlayır. Can dostlarımız qoruma altına alındı. Xilas edilən heyvanların müalicəsi davam edir. Daha sonra onlar yeni sahiblərinə veriləcək.”
Bundan başqa, Kənd Təsərrüfatı və Meşə İdarəsinin əməkdaşları vurğulayıblar ki, “Heyvanların sahiblənilməsi, baxımı və qorunması” çərçivəsində bu il ərzində vilayət üzrə ümumilikdə 2 milyon 507 min 120 TL cərimə tətbiq edilib.
