Uşaqlarda isti su, çay, qəhvə və yeməkdən yaranan yanıqların qarşısını sadə təhlükəsizlik tədbirləri ilə almaq mümkündür.
Sherg.az xəbər verir ki, bunu Karadeniz Texniki Universitetinin (KTU) Yanıq Mərkəzinin məsul şəxsi, həkim Mehmet Uluşahin bildirib.
Onun sözlərinə görə, uşaqlarda yanıqların bir qismi gündəlik həyatın ən adi anlarında baş verir. Süfrədəki isti çay və ya qəhvə, mətbəxdə olan qaynar su, eləcə də isti yeməklər uşaqlar üçün ciddi təhlükə yarada bilər.
Uluşahin qeyd edib ki, uşaqlar ətraflarındakı əşyaları kəşf etməyə meyilli olduqları üçün masadakı stəkanı özlərinə tərəf çəkmələri və ya isti mayeni üzərlərinə tökmələri ağır yanıqlara səbəb ola bilər.
Mütəxəssis ailələrə isti içkiləri uşaqların çata biləcəyi masa kənarlarında saxlamamağı və onları mümkün qədər uşaqların əlçatmaz olduğu yerlərdə yerləşdirməyi tövsiyə edib.
Uşaqların olduğu evlərdə elektrikli su qızdırıcıları və çaydanların təhlükəsiz yerdə saxlanılması vacibdir. Cihazların elektrik kabelləri aşağı sallanmamalı, qazanların tutacaqları isə çölə doğru qoyulmamalıdır.
Uluşahin həmçinin uşaqların prizlərə yad əşyalar salmasının, açıq və ya zədələnmiş elektrik kabellərinə toxunmasının və kabelləri ağızlarına aparmasının ciddi elektrik yanıqlarına səbəb ola biləcəyini bildirib.
Mütəxəssis vurğulayıb ki, valideynlərin evdə sadə təhlükəsizlik tədbirləri görməsi uşaqlarda ağır yanıqların qarşısının alınmasında mühüm rol oynayır.
