20 avqust 2025-ci ildə Yer kürəsini maqnit qasırğası vura bilər.
Oxu.Az-ın xəbərinə görə, bu barədə Rusiya Elmlər Akademiyasının Kosmik Tədqiqatlar İnstitutunun Günəş astronomiyası laboratoriyasının rəsmi saytında məlumat verilib.
Mütəxəssislər Bakı vaxtı ilə saat 19 radələrində Günəş aktivliyinin növbəti partlayışını gözləyirlər. Qasırğanın səviyyəsi G1.0 olacaq.
Xatırladaq ki, ekspertlər avqustun 19-da da maqnit qasırğası proqnozlaşdırmışdılar. Bazar ertəsi (18 avqust) başlayan qasırğa çərşənbə axşamı (19 avqust) səhərə qədər davam edəcək və Bakı vaxtı ilə səhər saat 7:00-dan günortaya kimi təxminən 9 ballıq şkala üzrə 5-ə yaxın gücdə kifayət qədər güclü qasırğa gözlənilir.
Tibb və fəlsəfə elmləri doktoru Adil Qeybulla “Sherg.az”a bildirdi ki, maqnit qasırğaları, ümumiyyətlə, Günəş sistemi yarandığı dövrdən mövcuddur:
“Onlar Günəşin nüvəsində baş verən güclü partlayışlarla əlaqədar olaraq elektromaqnit sahəsinin dəyişməsi nəticəsində formalaşır və təbii ki, ətraf mühitə, o cümlədən Günəş sisteminə daxil olan planetlərə təsir göstərir. Yer kürəsinin atmosferi olduğuna görə, Günəşin bəzi neqativ təsirləri insanlar tərəfindən birbaşa hiss olunmur. Əgər Yer kürəsinin atmosferi mövcud olmasaydı, gündüzlər səth həddindən artıq qızar, gecələr isə temperatur −170°С-yə qədər enə bilərdi. Ay səthində müşahidə olunan bu proseslər Yer kürəsində atmosferin mövcudluğu nəticəsində neytrallaşdırılır, istilik saxlanılır və bunun nəticəsində Yer kürəsində həyat mümkündür. Hər bir planetin özünəməxsus elektromaqnit sahəsi vardır və canlılar müəyyən qədər bu şəraitə adaptasiya olunun. Lakin bəzən Günəşin nüvəsində baş verən partlayışlar nəticəsində yaranan güclü elektromaqnit dalğaları Yer kürəsinin səthinə qədər çata bilir. Onların bir hissəsi atmosferdə neytrallaşır, lakin müəyyən hissəsi səthə qədər gəlib çıxır və bu, meteohəssas insanlarda klinik əlamətlərlə özünü göstərə bilər. Belə hallarda arterial təzyiqdə kəskin dəyişikliklər, bronxial astmalı xəstələrdə tutmalar, epilepsiya xəstələrində qıcolma hallarının yaranması, şəkərli diabetli xəstələrdə vəziyyətin ağırlaşması müşahidə edilə bilər. Bu səbəbdən xroniki xəstəliyi olan şəxslər maqnit qasırğaları barədə əvvəlcədən məlumatlandırılmalı, həkimlə məsləhətləşməli və profilaktik tədbirlər görməlidirlər. Belə dövrlərdə xüsusən qan təzyiqi tez-tez dəyişən, nevroloji problemləri olan, qeyri-stabil stenokardiya diaqnozu qoyulmuş şəxslər daha diqqətli davranmalı, əgər zəruri deyilsə, açıq havada uzun müddət fəaliyyət göstərməkdən çəkinməli və mütləq şəkildə həkim tövsiyələrinə əməl etməlidirlər”.
