25 min nəfəri əhatə edən genişmiqyaslı araşdırma aparılıb
Təxminən 25 min nəfəri əhatə edən genişmiqyaslı yeni araşdırmaya görə, isti hava dalğalarına uzun müddət məruz qalmaq, müntəzəm siqaret çəkmək və ya spirtli içki qəbul etmək kimi bədənin qocalmasına səbəb olur.
Sherg.az xəbər verir ki, araşdırma göstərib ki, isti dalğalara təkrar-təkrar məruz qalmaq, bədənin bioloji saatını sürətləndirir və xroniki sağlamlıq problemləri riskini artırır.
“Nature Climate Change” jurnalında dərc olunan araşdırmada 15 il ərzində 24 min 922 yetkinin sağlamlıq göstəriciləri araşdırılıb. Alimlər isti dalğalara məruz qalma müddəti ilə bioloji yaşın artması arasında aydın əlaqə aşkar ediblər.
Hər nə qədər dərhal hiss edilməsə də, bu yüksək temperaturla bağlı daxili zədələnmə və aşınma, müntəzəm siqaret çəkən və ya spirtli içki qəbul edən şəxslərdə müşahidə olunan zərərlərə bənzəyir. Nəticələr göstərir ki, xüsusilə uzun müddət davam etdikdə isti dalğalar, siqaret və spirt kimi qocalmanı sürətləndirir.
Bu təsiri ölçmək üçün alimlər 2008- 2022-ci illər arasında toplanmış sağlamlıq qeydlərini təhlil ediblər. Tayvan bu müddətdə təxminən 30 isti dalğası yaşayıb. Araşdırmada isti dalğa bir neçə gün ardıcıl davam edən anormal yüksək temperatur dövrləri kimi müəyyən edilib.
İştirakçılar qaraciyər, böyrək və ağciyər funksiyaları ilə yanaşı, qan təzyiqi və iltihab göstəricilərini yoxlayan müxtəlif tibbi testlərdən keçiblər. Alimlər bu məlumatları hər bir şəxsin xronoloji yaşla müqayisədə orqanizmin fəaliyyətini əks etdirən bioloji yaşını hesablamaq üçün istifadə ediblər.
Komanda yaşayış məlumatlarını istifadə edərək hər iştirakçının sağlamlıq müayinəsindən əvvəlki iki ildə məruz qaldığı ehtimal olunan istiliyi hesablayıb. Hər əlavə 1,3 dərəcə Selsi istilik artımı bir şəxsin bioloji yaşına təxminən 0,023- 0,031 il əlavə edib.
“Greek Reporter”-in məlumatına görə, bu rəqəmlər ayrıca baxıldıqda kiçik görünə bilər, lakin Honq Konq Universitetinin ətraf mühit epidemioloqu, araşdırmanın baş müəllifi Cui Guo, bu təsirlərin bütün əhali miqyasında və zamanla əhəmiyyətli ola biləcəyini deyib.
