Ermənistan daha həmsədrlik institutunu dirçəldə bilməyəcək
ABŞ-ın məqsədi Azərbaycanla Ermənistan arasında imzalanacaq sülh müqaviləsinin sətirləri arasına öz marağını qatmaqdır
ABŞ dövlət katibinin köməkçisi Karen Donfrid Dövlət Departamentindən alınan təlimat əsasında, ABŞ-ın Qafqazdakı danışıqlar üzrə baş müşaviri Endryu Şoferi Ermənistana yola salıb. Şofer İrəvandan sonra Bakıya gələcək. Ekspertlərin fikrincə, səfər Azərbaycan-Ermənistan münasibətlərinin normallaşması prosesində Qərbin bundan sonrakı rolunun hansı səviyyədə olacağını müəyyən etmək üçün kəşfiyyat xarakteri daşıyır. Şoferin siması və soyadı bizə əvvəldən tanışdır. O, bundan əvvəl ATƏT-in Minsk qrupunun amerikalı həmsədri qismində regiona səfərlər edib.
Siyasi şərhçi Aqşin Kərimov vurğulayıb ki, biz “ATƏT-in Minsk qrupunun həmsədri” ifadəsini işlədərkən taleyi sual altında olan, faktiki olaraq “dəfn edilən” bir institutu nəzərdə tuturuq. Analitik qeyd edib ki, son iki ildəki tablodan çıxarış etsək, görərik ki, ATƏT-in Minsk qrupunun ali platforması olan həmsədrlik kürsüsü Azərbaycan-Ermənistan münasibətlərinin normallaşmasına dair normal düsturlar verə bilmir:
“Ukraynadakı müharibə isə ABŞ, Rusiya və Fransanı Cənubi Qafqaza dair onsuz da əvvəldən də şübhəli olan vahid baxış müstəvisindən uzaqlaşdırır. Tərəflər ancaq öz dövlətlərinin iradəsi ilə proseslərdə aktiv iştirakçılığa can atırlar. Elə ABŞ Dövlət Departamenti də amerikalı diplomatın regiona səfərini həmsədr qiyafəsindəki trafik adlandırmaqdan qaçır. Buna rəğmən, Ermənistan hələ də “bulanıq suda balıq tutmaq” sevdasından əl çəkmir. Ermənistanın rəsmi resursları və media platformasının təqdimatlarında Şoferin İrəvanda keçirdiyi görüşlər “həmsədr” çərçivəsinə salınır. Məlumatlarda Şoferin adının önünə “həmsədr” epiteti yapışdırılır”.
A.Kərimov bəyan edib ki, Minsk qrupunun tərkibinin dəyişdirilməsi və ya həmsədrlik postunun ləğvi proseduru həyata keçirilməyib. Amma faktiki olaraq həmsədrlik dərinləşən qlobal ziddiyyətlər burulğanında sovrulub:
“Bu tezisi gücləndirən arqumentlər isə Rusiyanın rəsmi şəkildə bəyanatlarıdır. Həmçinin, bir neçə gün öncə fransalı həmsədr Bris Rokfeylin Ermənistana səfər etməsidir. Rokfeyl həmsədr qismində deyil, Fransa Xarici İşlər Nazirliyinin Şərq tərəfdaşlığı üzrə xüsusi nümayəndəsi kimi İrəvanda idi. ABŞ da yaydığı informasiya ilə həmsədrliyin tarixə qovuşduğu məntiqini gücləndirdi. İndi Ermənistanın “həmsədr” müraciəti isə ümidsizlik və çarəsizlikdən doğan təəssüratlardır və instinktiv mahiyyət daşıyır. ABŞ-ın məqsədi həmsədr kimi yox, məhz qlobal oyunçu kimi Azərbaycanla Ermənistan arasında imzalanacaq sülh müqaviləsinin sətirləri arasına öz marağını qatmaqdır. Prosesin qlobal çəkişmələr fonunda hansı yöndə olacağı başqa mövzudur. Demək istədiyimiz odur ki, Ermənistanın həmsədrliyi diriltmək cəhdlərinin heç bir əsası yoxdur və bu səyləri nəticəsiz qalacaq”.
