Ermənistan baş naziri Nikol Paşinyanın 27 iyun 2022-ci il tarixində onlayn mətbuat konfransında Azərbaycanı blokada siyasəti yürütməkdə ittiham edib və bir sıra xöşəlgəlməz iddialar irəli sürüb. Azərbaycan Respublikası Xarici İşlər Nazirliyinin Mətbuat xidmətindən N.Paşinyana cavab gecikməyib.
Bildirilib ki, 30 ilə yaxın Azərbaycan ərazilərinin bir hissəsini hərbi işğal altında saxlayaraq bu əraziləri darmadağın edən bir ölkənin rəhbərinin, Azərbaycanı bu illər ərzində blokada siyasətini yürütməkdə ittiham etməsi heç bir hüquqi və əxlaqi çərçivəyə sığmır:
“Baş nazir Paşinyana xatırladırıq:
Azərbaycan, Ermənistanın işğalçı siyasətinə rəğmən və ərazilərində onilliklər ərzində Ermənistan tərəfindən tətbiq edilmiş “hər şeyi məhv etmək” yanaşmasına baxmayaraq, ərazilərini azad etdikdən sonra iki dövlət arasında münasibətlərin normallaşması tərəfdarı və təşəbbüskarı olub. Məhz Azərbaycan dövlət başçısı, post-münaqişə mərhələsində beynəlxalq hüququn prinsiplərinə ciddi riayət edilməsi əsasında sülh sazişinin imzalanması təklifi ilə çıxış edib. Hətta, Azərbaycan tərəfi Sazişin əsaslanmalı olduğu baza prinsiplərini də qarşı tərəfə təqdim edib. Paşinyanın iddia etdiyi kimi, Azərbaycan müharibə istəsəydi, yəqin ki, bu addımlara ehtiyac qalmazdı. Əgər Azərbaycan müharibə istəsəydi, Ermənistanın 30 il ərzində yerlə yeksan etdiyi ərazilərin yenidən qurulması və bərpası üçün böyük səylər sərf edib, nəhəng işlər görməzdi.
Azərbaycan tərəfi, iki ölkə arasında sərhədlərin delimitasiyası, bölgədə bütün kommunikasiyaların açılması və tərəflər arasında gələcək sülh sazişinin imzalanması istiqamətlərində yalnız sözdə açıqlamalar vermir, öz əməlləri və konkret addımları ilə söylədiklərini həyata keçirir. Uzun illər ərzində məhz Azərbaycan tərəfi, bölgədə normal münasibətlərin qurulmasının və bütün kommunikasiyaların açılmasının Ermənistana faydalı olacağını söyləyib. Ermənistan tərəfinin bunu nəhayət anlaması və baş nazirin “kommunikasiyaların açılması Ermənistana sərf edir” söyləməsi, Ermənistan rəhbərliyinin yeni yanaşması kimi diqqəti cəlb edir. Görünür, həqiqətlərin Ermənistan tərəfindən qəbul edilməsi bir qədər vaxt tələb edir. Ümid edirik ki, artıq reallığa çevrilən Zəngəzur dəhlizinin fəaliyyətinin səmərəliliyinin Ermənistan tərəfindən dərk edilməsi üçün böyük zamana ehtiyac qalmayacaq.
Üçtərəfli bəyanatlara gəldikdə, bu sənədlə tərəflərin üzərinə götürdüyü öhdəliklər və onların icrası göz qabağındadır. Sənədin iddialarını kobud şəkildə pozaraq Azərbaycan ərazilərinə diversant qüvvələr göndərən, Azərbaycan ərazilərindən qanunsuz silahlı birləşmələrini çıxarmayan, kommunikasiyaların açılmasını uzun müddət ərzində ləngidən Ermənistan bu bəyanatların icrasını kobud şəkildə pozur.
Ermənistan baş naziri, konkret hansı hala istinad etdiyinə aydınlıq gətirmədən “Azərbaycan tərəfinin ən azı bir halda görüşün keçirilməsini boykot etdiyini” söyləyir. Əgər, post münaqişə mərhələsində indiyədək beynəlxalq vasitəçilərin iştirakı ilə də təklif edilən və Ermənistan tərəfindən müxtəlif bəhanələrlə pozulan, habelə keçirilməsinə 1-2 saat qalmış təxribatlarla təxirə salınan görüşləri sadalamağa başlasaq, siyahı çox uzun olar.
Ermənistan həqiqətən sülh istəyirsə, səmərəlilik əmsalı hər zaman aşağı olan və hazırda üzvləri tərəfindən açıq şəkildə fəaliyyətinin qeyri-mümkünlüyü etiraf edilən bir formatı dirçəltməyə zaman sərf etməkdənsə öz siyasi iradəsini ortaya qoyub sülh istiqamətində konkret addımlar atmalıdır”.
N.Paşinyanın bəyanatının müxtəlif addımlara hesablandığı deyən hərbi-siyasi ekspert Həşim Səhrablı "Sherg.az"a bildirib ki,buradakı məqsədlərdən biri Paşinyanın reytinqini daxili siyasətdə qaldırmaqdır:
"Bir neçə ay əvvəl Azərbaycan və Ermənistan arasında ikili münasibətlər kontekstində sülh müqaviləsinin imzalanması məsələsi var idi. Bu hazırkı geosiyasi vəziyyətdə mümkün deyil.Çünki xarici qüvvələrin təsiri ilə problemlər yaranır. N.Paşinyan daxili arenada böyük nüfuz itkisi yaşamışdı. Bilirik ki, Ermənistan cəmiyyətində səbəbsiz türk düşmənliyi var. N.Paşinyan türk agenti olmaqda ittiham edilirdi. Ona görə də Ermənistanın baş naziri belə addımlar atır ki, edilən ittihamlardan və türk agenti damğasından qurtulsun. Digər tərəfdən bu açıqlamaların ikinci məqsədi Azərbaycanın istəklərinə boyun əyməyərəkdən münasibətləri normallaşdırmaq cəhdləridir. Onlar yaxşı hesablamış olmalıdırlar kı, Ermənistan artıq beynəlxalq hüquqa tabe olacaq şəkildə qərarları dəstəkləsə və Azərbaycanla bu kontekstdə müqavilə imzalasa, gərək geosiyasətinin böyük hissəsindən imtina etsin. Bunun başında Qarabağ, Zəngəzur dəhlizi və.s gəlir. Ermənistan tərəfi az zərərlə çıxmağa çalışır. Buna görə də diqqətləri Azərbaycana yönəldərək özlərini zərərçəkən kimi göstərməyə çalışırlar.Bununla da beynəlxalq arenada dəstəklərini çoxalmağa çalışırlar".
