İl dəyişdi, amma uşaqlar arasında yoluxucu xəstəliklər azalmadı. Qızılca, göyöskürək, su çiçəyi, skarlatina və mövsümi respirator xəstəliklər yayılmaqda davam edir.
Mövsümi xəstəliklərin hər il olduğunu xatırladan pediatr Vaqif Qarayevin "Sherg.az"a açıqlamasına görə, peyvənd altına düşən xəstəliklər bu qədər yayılmamalı idi:
" Diqqəti qızılcaya yönəltmişik, yoluxmanın sayını azaltmaq istəyirik. Hərçənd ki, bu xəstəliklə bağlı peyvəndə gedənlərin sayında fərq var. Bu da müsbət tendensiyadır. Bəs göyöskürəklə nə edək? Xəstələnənlərin hamısı peyvəndsiz uşaqlardır. Hazırda bu infeksiyanın da ciddi ağırlaşmaları var. Çox təəssüf ki uşaq kollektivlərində təcridə əməl olunmur. Halbuki dəfələrlə qeyd edilib ki, xəstə kuşaq məktəbə, bağçaya getməməlidir. Hətta infeksiyaya yoluxmuş uşaqlar poliklinikalara da getməməlidir. Sahə həkimləri evdə baxmalıdır belə uşaqlara! Yoluxduruculuq müddəti bitdikdən sonra isə uşaq kollektivinə getmək üçün arayış verməlidir. Belə olurmu?-Yox! Əksər valideynlər şikayətlənir ki, arayış cəmi 1 həftə üçün verilir, düzgün deyil!
Uşaqları qoruyaq".
Həkim qeyd edib ki, göy öskürək - davamlı tutmaşəkilli öskürəklə xarakterizə olunan infeksion xəstəlikdir. Xəstəlik daha çox uşaqlarda rast gəlinir. Bəzən böyüklər də bu xəstəliyə tutula bilər:
"Yenidoğulmuşlar və 1 aylığına qədər olan körpələr üçün göy öskürək çox təhlükəlidir. Xəstəliyin törədicisi - göyöskürək çöpüdür.
Uşaqlarda göy öskürəyə qarşı həssaslıq çox yüksəkdir. Xəstə ilə sadə təmas zamanı yoluxa bilər. Ona görə də onlara mütləq bu xəstəliyə qarşı peyvənd vurmalıdır. Hansı ki bu peyvənd bütün uşaqlar üçün vacib olan peyvəndlər siyahısına daxildir. Peyvənd olunmuş uşaq göy öskürəyə tutulsa da, onu daha yüngül keçirir. Keçirilən xəstəlikdən sonra davamlı ömürlük immunitet əmələ gəlir. Uşaqlıqda bu xəstəliyi keçirməmiş böyüklər də istənilən yaşda göyöskürəyə yoluxa bilərlər.
Göy öskürək zamanı öskürək davamlı və tutmaşəkilli xarakter alır. Bir neçə dəqiqə çəkən ağır tutmaşəkilli öskürək fit səsli dərin nəfəsalmalarla əvəzlənir. Bu zaman uşağın üzü qızarır, sonra göyərir, boynunda damarlar genişlənir, gözlər qanla dolur. Bəzən öskürək tutmasından sonra uşaqda qusma, qeyri-iradi sidik ifrazı, hətta qıcolmalar olur. Üzücü öskürəkdən sonra uşaq halsız, yorğun olur, sifəti avazımış və bir qədər şişkin görünür.
Südəmər uşaqlarda göy öskürək zamanı baş verən öskürək tutmaları tənəffüsün dayanmasına gətirib çıxara bilər! Məhz buna görə də göy öskürəyə tutulmuş uşaqları nəzarətsiz qoymaq olmaz! Yeganə profilaktikası uşağa vaxtında bu təhlükəli xəstəliyə qarşı vurulmuş peyvənddir".
Onu da deyək ki, göy öskürək öz fəsadları ilə də təhlükəli hesab edilir - pnevmoniya (sətəlcəm), kəskin laringit (qırtlağın iltihabı), göbək və qasıq yırtıqları, burun qanaxmaları, tənəffüsün dayanması, nevroloji pozulmalar və s. Xəstəlik başladıqdan sonra diaqnoz nə qədər tez qoyularsa, xəstə uşağı müalicə etmək bir o qədər asan olur. Sağalma tədricən baş verir, öskürək tutmalarının sayı yavaş-yavaş azalır. Göy öskürək keçirən uşaqları uzun müddət pediatr, pulmonoloq və bəzi hallarda isə hətta nevropatoloq nəzarət altında saxlamalıdır.
