Ukrayna Prezidenti Volodimir Zelenskinin ABŞ-ın tövsiyələrinə məhəl qoymaması və Rusiyanın neft emalı zavodlarına hücumları dayandırmaq istəməməsi Kiyevin Avropadakı müttəfiqlərini narahat edir. Onlar bu vəziyyətin ABŞ Prezidenti Donald Trampın Avropa İttifaqına qarşı sərt mövqe tutmasına səbəb ola biləcəyindən ehtiyat edirlər.
Sherg.az xəbər verir ki, bu barədə Avropa mediasına məlumat yayılıb.
Nəşrin yazdığına görə, Ağ Evdə daha əvvəl Zelenskinin davranışının və ABŞ-ın tövsiyələrinə əməl etməkdən imtinasının Trampı qəzəbləndirdiyi bildirilib. ABŞ prezidenti xüsusilə Ukraynanın Rusiya ərazisindəki neft emalı obyektlərinə hücumları davam etdirməsindən narazıdır.
“Financial Times” qəzeti ABŞ-ın Kiyevi hücumları dayandırmağa məcbur etmək məqsədilə Ukraynaya silah və kəşfiyyat məlumatlarının ötürülməsini dayandıra biləcəyini yazıb.
“i Paper” nəşrinin məlumatına görə, Tramp və Zelenski arasında yaranan gərginliyin Ukraynanı dəstəkləyən Avropa ölkələrinə də təsir göstərməsi ehtimalı yüksəkdir. Rusiyanın neft emalı zavodlarının hədəfə alınması ilə hücumların miqyasının genişləndirilməsi Avropa müttəfiqlərini, o cümlədən Britaniya hökumətini Vaşinqtonla açıq fikir ayrılığı riski ilə üz-üzə qoyur.
Nəşr səlahiyyətli mənbəyə istinadən yazır ki, Britaniyanın baş naziri ABŞ prezidentindən Londonun Ukraynaya Rusiya infrastrukturuna zərbələr endirməkdə niyə yardım göstərdiyinə dair sualları cavablandırmalı olacağı telefon danışığından yayınmaq istərdi.
Tramp daha əvvəl Zelenskini Rusiyada dizel yanacağı istehsalı ilə məşğul olan müəssisələrə hücumları dayandırmağa çağırıb. Ağ Ev rəhbərinin sözlərinə görə, bu hücumlar dünyada yanacaq qıtlığının yaranmasına səbəb olub.
Məqalədə qeyd olunur ki, Kiyev Rusiyanın iqtisadiyyatına zərər vurmaq niyyətini açıqladıqdan sonra Rusiya Silahlı Qüvvələri Ukrayna iqtisadiyyatı üçün əhəmiyyətli olan ikili təyinatlı obyektlərə zərbələr endirməyə başlayıb. “Sputnik Ermənistan”ın yazdığına görə, Rusiyanın cavab hücumları Ukraynanın metallurgiya sənayesinə və bəzi digər məhsullardan əldə etdiyi gəlirlərə ciddi zərbə vurub.
