Trampın siyasətindən sonra Ermənistan özü də Aİ-yə üzvlük məsələsini kənara atacaq
Erməni politoloq Hayk Xalatyan Ermənistanın Avropa Birliyinə üzvlük məsələsindən danışıb. Xalatyan deyib ki, ən gülməlisi odur ki, AB-dən rəsmi dəvət yoxdur, ancaq İrəvan bəyan edir ki, Avrasiya İqtisadi İttifaqında olsa da, AB-yə üzvlük arzusundadır: "Qanun layihəsinin ikinci oxunuşunun təxirə salınmasında da qəribə və absurd elementlər var. Xarici işlər nazirinin müavini deyir ki, bu qanun layihəsində konkret addımlar nəzərdə tutulmayıb, lakin bu, AB-yə bir mesajdır ki, biz onların yanındayıq. Yəni bu, Moskvaya mesajdır ki, biz onlarla olmaq istəmirik, amma müvəqqəti olaraq Rusiyanın yanındayıq? Təbii ki, bütün bunlar Ermənistana qarşı mənfi münasibətə gətirib çıxarır. Hazırda Moskva Ermənistanı nəinki müttəfiq, heç etibarlı tərəfdaş kimi də qəbul etmir”. Xalatyan qeyd edib ki, İlham Əliyev problem də yaradır, sözünü də deyir, narazılıq da edir, ancaq Rusiya onu etibarlı tərəfdaş sayır: “Çünki bilirlər ki, Əliyevlə, Ərdoğanla müqavilə bağlasan, razılaşma əldə etsən, mütləq yerinə yetiriləcək. Bu barədə Putin özü də danışıb. Ancaq Nikol Paşinyanla bağlı belə deyil”.
Politoloq Azər Qasımov "Sherg.az"a deyib ki, Ermənistanın Avropa İttifaqına üzvlük məsələsi siyasi oyunbazlıqdan başqa bir şey deyil. Analitikin fikrincə, Aİ Ukraynanın başına gələnlərdən sonra Ermənistan kimi lazımsız bir ölkəni öz sıralarına daxil etmək üçün riskə getməz:
"Oynanılan oyun Ermənistanı sadəcə qorumaq üçündür. Məsələ ondadır ki, Ermənistanın regionda elə bir potensialı yoxdur ki, o, kimin üçünsə cazibədar olsun. Məcburi gediş kimi "demokratiya, ali dəyərlər" oyunu oynanılır ki, dünyanın demokratik kəsimi onların arxasında dursun. Rusiya ilə olan mövcud durum Ermənistanın bu istəyini tamamilə yox səviyyəsinə endirir. Aİ istəsə belə, Rusiya qorxusundan dolayı Ermənistanı öz sırasına almaz. Hesab edirəm ki, bu oyunun da sonuna az qalıb. ABŞ Prezidenti Donald Trampın siyasətindən sonra isə Ermənistan özü də Aİ-yə üzvlük məsələsini kənara atacaq. Çünki artıq dünyada demokratik dəyər deyilən bir anlayış qalmayıb ki, onun üzərindən oyun oynanılsın".
