Paşinyan daxili və xarici təzyiqlər altında olduğundan siyasi iradə nümayiş etdirə bilmir
"Ermənistan-Azərbaycan münasibətlərinin normallaşdırılması və sülh sazişinin imzalanması Cənubi Qafqaz üçün böyük əhəmiyyət kəsb edir".
Bu barədə "Sherg.az"a açıqlamasında politoloq Əli Oruclu deyib.
Ekspert bildirib ki, Bakı ilə İrəvan bu prosesi nə qədər tez uğurla başa çatdıra bilsələr, dayanıqlı sülhün və təhlükəsizliyin təmin olunması da o qədər tez olar:
"Lakin görünən odur ki, Ermənistan sülhün qısa müddətdə əldə olunmasına o qədər də maraq göstərmir. Baxmayaraq ki, dəfələrlə sülh sazişinin imzalanmasına hazır olduğunu bəyan etməklə özünü beynəlxalq ictimaiyyətə "sülhpərvər" kimi təqdim edir. Azərbaycan sülhün əldə olunmasını 5 prinsipə bağlayır və bunlardan biri də tərəflərin ərazi bütövlüyünə və suverenliyinə hörmət edilməsidir. Lakin təəssüflər olsun ki, Ermənistan bu istiqamətdə ciddi mane yaradan Konstitusiyasına düzəlişlər etməyə, Azərbaycana və Türkiyə qarşı ərazi iddialarını ləğv etməyə tələsmir".
Analitik vurğulayıb ki, rəsmi İrəvan razılaşdırılmışdılması mümkün olan şərtlərlə müqavilə imzalanmasında təkid edir:
"Deyirlər ki, saziş olsun, digər detallar üzərində isə iş davam etdirilsin. Bu haqlı olaraq Azərbaycan tərəfindən rədd edilir. Çünki yarımçıq, bütün tərəfləri tam qane etməyən sülh ziddiyyətləri bütünlükdə aradan qaldırmaqdan gələcəkdə yeni qarşıdurmalara yol aça, deeslakasiya riskini artıra bilər. Odur ki, sülh prosesinə Bakı daha real yanaşır. Onu da qeyd etmək lazımdır ki, Ermənistan hakimiyyəti daxili və xarici basqılar altında olduğundan siyasi iradə nümayiş etdirə bilmir. Paşinyanın addımları daha çox qlobal siyasi təsirlərlərə bağlı olur. ABŞ-də hakimiyyət dəyişikliyi və Trampın prezidentliyə qayıtması regionda Vaşinqtonun yürüdəcəyi siyasət də sülh prosesinin sürətində iz buraxacaq. Hər halda istərdik ki, regionda inkişafa, əlaqələrə və münasibətlərin normallaşmasına əngəllər qısa zamanda aradan qaldırılsın. Cənubi Qafqaz həddindən artıq yüklənib və yorğundur".
