Bu gün Azərbaycan-Türkiyə qardaşlığı, dostluğu Cənubi Qafqaz regionunda, eyni zamanda onun hüdudlarından kənarda sabitliyin, təhlükəsizliyin, sülhün və əmin-amanlığın zəmanətidir.
Bu fikirləri Prezident İlham Əliyev fevralın 13-də Türkiyənin Azərbaycanda yeni təyin olunmuş fövqəladə və səlahiyyətli səfiri Birol Akgünün etimadnaməsini qəbul edərkən deyib.
Dövlət başçısı qeyd edib ki, Azərbaycan və Türkiyə daim çiyin-çiyinə bir-birinin yanındadır.
Prezident əlavə edib ki, Suriya məsələsində də Azərbaycan Türkiyənin yanında olduğunu ilk günlərdən bəyan edib. Bu xüsusda vurğulanıb ki, Suriyada sabitliyin, təhlükəsizliyin təmin olunmasına və humanitar problemlərin həllinə Azərbaycan da Türkiyə ilə əlaqələndirilmiş şəkildə öz töhfəsini verməyə hazırdır.
Siyasi şərhçi Azər Həsrət "Sherg.az"a deyib ki, Suriya Azərbaycan üçün yabancı coğrafiya deyil:
"Baxmayaraq ki, bir ərəb dövləti kimi qəbul edilir, lakin tarixən böyük türk coğrafiyasının bir hissəsi olub və bu gün də elə qalmaqdadır. Üstəlik, Azərbaycana birbaşa dəxli olan ərazidir. Azərbaycanın Suriyada maraqlarının olması qeyri-adi bir şey deyil. Əksinə, qardaş ölkə olaraq, Suriya ilə bağlı bizdən çox böyük gözləntilər var. Hətta bu yaxınlarda Suriyadakı türkmən qardaşlarımız müraciət etmişdilər ki, bizim xaraba qoyulmuş yurdlarımızın bərpasında Azərbaycan dövlətini arxamızda görmək istərdik. "Azərbaycan əlindəki imkanlarla bizə yardımçı olsun". Hələ də Suriyanın ən qədim və məşhur şəhərlərindən olan Hələbdə böyük şairimiz Nəsiminin məqbərəsi mövcuddur. Digər tərəfdən qardaş Türkiyə Suriya hərəkatının önündə gedir. Türkiyə haradadırsa, biz də oradayıq. Yəni əl-ələ verərək, çiyin-çiyinə bu dövlətin yenidən qurulmasında Azərbaycan dövləti də iştirak etməlidir. Cənab Prezident İlham Əliyev də Türkiyənin Azərbaycanda yeni təyin olunmuş fövqəladə və səlahiyyətli səfirinin etimadnaməsini qəbul edərkən məhz bunu dilə gətirib".
Şərhçi əlavə edib ki, ümumiyyətlə həm yaxşı, həm də pis gündə Türkiyə ilə birlikdəyik:
"Söhbət Suriyadan gedirsə, orada bizim milyonlarla soydaşımız, Suriya türkləri, bayır-bucaq türkmənləri yaşayır. Eyni zamanda bu yolda ilk addımlar da atılıb. Azərbaycanın nümayəndəsi Suriyaya gedib. Həmçinin Türkiyə üzərindən bu ölkəyə humanitar yardım göndərilib. Prezident bu fikirləri söz xatirinə demir və əməldə də həyata keçirməyə davam edəcəyik".
