Azərbaycanın aktiv iştirak etdiyi beynəlxalq tədbirlər sırasında Davos İqtisad Forumu xüsusi rola malikdir. Bu il 55-ci iclasını keçirən Forumda qlobal iqtisadi məsələlər ətrafında ciddi müzakirələr aparılır, panel iclaslar keçirilir.
Nüfuzuna görə Davos Forumu yüksək reytinqə malikdir və bu səbəbdən də burada aparılan müzakirələrə diqqət də yüksək olur.
Məlumat üçün bildirək ki, Azərbaycanın Davos Forumunda ilk dəfə iştirakı 1995-ci ilə təsadüf edir. Həmin ilin 27-31 yanvar tarixlərində Ulu Öndər Heydər Əliyev ilk dəfə olaraq Forumda iştirak edib. Sonrakı illərdə də bu ənənə Azərbaycan Prezidenti İlham Əliyev tərəfindən davam etdirilib.
O, 2007-ci ildən başlayaraq mütəmadi olaraq bu tədbirdə iştirak edir və bu, səbəbsiz deyil. Cənubi Qafqazda lider mövqeyə malik olan Azərbaycan hər il sosial-iqtisadi, siyasi, enerji, nəqliyyat və digər sahələrdə uğurlar əldə edir və bu nailiyyətlərə dünyanın marağı getdikcə daha da artır.
Azərbaycanın Davos İqtisadi Forumunda iştirakı və fəallığını ilbəil artırması Prezident İlham Əliyevin rəhbərliyi sayəsində ölkəmizin davamlı uğurları ilə bağlıdır. Dövlət başçısı hər il keçirilən iclaslar çərçivəsində çıxışlar edib, panellərə qatılıb, çoxsaylı suallara cavab verib.
Bu uğurun nəticəsidir ki, Azərbaycan 2013-cü ilin aprelin 12-də Dünya İqtisadi Forumunun iştirakçılarını Bakıda qəbul etdi. Dünyanın iqtisadi vəziyyətini proqnozlaşdıran tanınmış iqtisadçılar, ekspertlər, dövlət və hökumət nümayəndələri Bakıda bir araya gələrək bəşəriyyəti narahat edən mühüm iqtisadi məsələləri müzakirə etdilər.
Milli Məclisin deputatı Aydın Hüseynov "Sherg.az"a deyib ki, Azərbaycanın coğrafi baxımdan şərqlə qərbin, şimalla cənubun kəsişmə nöqtəsində olması ölkəmizin tranzit və logistik imkanlarını getdikcə artırır:
"Tarixi İpək yolunun üzərində yerləşməsi Azərbaycana həm də müxtəlif fəaliyyət planları hazırlamağa, yeni layihələr həyata keçirməyə sövq edir. Qərblə şərqin iqtisadi əlaqələrini tənzimləyən tranzit xətlər son illərin hadisələri səbəbindən yaşanan gərginlik, baş verən hərbi toqquşmalar səbəbindən demək olar ki, iflic olub. Belə bir şərtlər daxilində əlaqələrin davamını təmin etmək üçün İpək yolu üzərində olan ölkələr alternativ yollar axtarışında Azərbaycanın imkanlarını da dəyərləndiriblər. Ölkəmizin tranzit və nəqliyyat-logistik imkanları, etibarlı tərəfdaş olması bütün diqqətlərin regionumuza fokuslanmasına səbəb olub”.
Deputat qeyd edib ki, Davosda Prezident İlham Əliyevlə qarşı tərəfin müraciəti əsasında “DP World” şirkətlər qrupunun sədri və icraçı direktoru Sultan Əhməd bin Sulaimın görüşü də ölkəmizin Şimal-Cənub və Şərq-Qərb nəqliyyat dəhlizlərinin yaratdığı imkanların müzakirəsi üçün baş tutub:
“Bu gün dünya ticarətində aktiv iştirak edən beynəlxalq yükdaşıma şirkətləri sanksiyaların təsirinə düşməmək üçün alternativ yollar axtarırlar. Rusiya və İran ərazisi sanksiyalar səbəbindən keçilməzdir. Azərbaycan isə ən unikal imkanlar vəd edir. Ötən ilin aprel ayında Cənub Transxəzər marşrutu ilə Çinin Sian şəhərindən ilk konteyner qatarı Avropaya yola düşüb. Yük Qazaxıstan, Azərbaycan, Rumıniya, Macarıstan, Slovakiya və Çexiya vasitəsilə Mannheymə (Almaniya) göndərilib. Ölkəmiz Transxəzər marşrutuna daxil olan ölkələrlə iqtisadi əlaqələrini genişləndirib. Orta Dəhlizin digər iştirakçıları ilə münasibətlər yüksələn xətt üzrə inkişaf edir. Regionun nəqliyyat arteriyalarının daha da şaxələnməsi üçün daha geniş imkanlar yaranıb. Qarabağın və Şərqi Zəngəzurun yenidən qurulması və Zəngəzur dəhlizinin açılması ilə bu imkanlar daha da artacaq. İmkanları ilə Şərqlə Qərbi daha sıx birləşdirəcək Zəngəzur dəhlizi Azərbaycanın nüfuzunu bir daha yüksəldəcək. Azərbaycan inkişaf kursuna və əməkdaşlıq formatlarının rəngarəngliyinə görə çox fərqlənir və sülhsevər, sivil, dinc yanaşı yaşama fəlsəfəsini nəzərə alan və davamlı inkişaf edən ölkədir”.
