Bunun arxasında post-münaqişə dövründəki məğlubiyyətlərini əsaslandırmaq cəhdləri dayanır
“Ermənistanın Baş naziri Nikol Paşinyan Azərbaycana siyasi, diplomatik və hərbi cəbhədə ard-arda məğlub olmasının “səbəblərini” izah etmək üçün “casus ovu”na çıxıb”.
Bunu “Şərq”ə açıqlamasında siyasi şərhçi Aqşin Kərimov deyib. Ekspert bildirib ki, Ermənistanın Milli Təhlükəsizlik Xidməti bir çox erməni zabitinin sosial şəbəkələrdə xarici xüsusi xidmət orqanları tərəfindən ələ alınması ehtimalı ilə 19 nəfəri saxlayıb: “İddialara əsasən, həmin zabitlərin bir qismi Azərbaycana “işləyirmiş”. Ermənistanın bulanıq suda balıq tutmasının arxasında post-münaqişə dövründəki məğlubiyyətlərini əsaslandırmaq cəhdləri dayanır. Ermənistanın məğlubiyyət pillələrində “uğurla” irəliləməsi Paşinyan administrasiyasında və erməni cəmiyyətində çaşqınlıq sindromunu gücləndirir. Məğlubiyyət şüuru həmişə xain axtarışları üçün bəhanə yaradan amilə çevrilir.
Üstəgəl, Ermənistandakı “casus ovu” Paşinyanın gələcək üçün yeni güzəşt aktlarına imza atmasının anonsu kimi də dəyərləndirilə bilər. Yəni Paşinyan axarı hakimiyyətini qorumaq və etibar qazanmaq üçün öz maraqları səmtinə çevirir”.
A.Kərimovun fikrincə, ittihamlarda göstərilir ki, erməni hərbçilər qoşunların dislokasiyası, hərbi texnikaların sayı və növləri haqqında “qarşı tərəfə” məlumatlar ötürüb: “Azərbaycanın belə “məlumatlara” ehtiyacı yoxdur. Azərbaycan öz texniki və hərbi vasitələri ilə Ermənistan ordusunun hərəkət trayektoriyasını, silahlarını, hətta Ermənistana verilən silahlar haqqında məlumatlara malikdir. Ermənistan postmünaqişə dövründə Azərbaycanın sərhədə çıxışını əngəlləmək üçün bir sıra hərbi təxribata əl atdı.
Post-konflikt dövrünün ən güclü hərbi toqquşması 2021-ci ilin noyabr ayında Laçın və Kəlbəcər istiqamətində oldu. Nəticədə Azərbaycan təxribatlara cavab olaraq daha böyük strateji əhəmiyyətə malik nöqtələrdə möhkəmləndi. İndi Paşinyan hökuməti çıxılmaz vəziyyətdə qalaraq Zəngəzur dəhlizinin açılması prosesini icra etməyə məcburdur.
Amma normallaşma prosesinə qarşı çıxan revanşist qüvvələrin müqavimətini qırmaq və iradəsini sındırmaq Paşinyanın ölkədaxili məsuliyyəti kimi onun çiyninə yüklənir. Paşinyan bu məsuliyyətin öhdəsindən gəlməyi bacarmasa, yeni zərbələrə məruz qalacaq. Azərbaycan tərəfindən bu cür senarilərə qarşı həyata keçirəcəyi addımların miqyas və xarakteri haqqında geniş danışmağa dəyməz.
İndi Paşinyan nə edir, hansı tədbir görür, cəmiyyəti hansı hadisələrə hazırlayır - özü bilər. Ancaq Azərbaycan və Türkiyə ilə münasibətləri normallaşdırmağa məhkumdur”.
