ATƏT-in Minsk qrupu faktiki olaraq fəaliyyətsizdir, ona ehtiyac yoxdur
Dövlət başçısı İlham Əliyevin ATƏT-in fəaliyyətdə olan sədri İan Borqla görüşündə təşkilatla bağlı irad və təklifləri diqqət çəkib. Qarabağ münaqişəsinin başa çatdığını vurğulayan Prezident qeyd edib ki, ATƏT çərçivəsində keçmişin qalıqları olan Minsk qrupu, Yüksək Səviyyəli Planlaşdırma Komitəsi və ATƏT-in fəaliyyətdə olan sədrinin şəxsi nümayəndəsi kimi tamamilə fəaliyyətsiz olan strukturlar rəsmi qaydada ləğv edilməlidir. Ölkə rəhbəri ATƏT çərçivəsində büdcənin daha məqsədyönlü və vacib layihələrə istiqamətləndirilməsinin önəmini qeyd edib. Ötən illərdə də dövlət rəhbəri Minsk qrupu haqqında qiymətini verib, sözünü deyib. Prezident Vətən müharibəsindən az sonra, 2020-ci ilin 12 dekabrında onların israrlı xahişindən sonra ATƏT-in Minsk qrupunun həmsədrlərini qəbul etmiş və Bakıya gələn “çağırılmamış qonaqlar”a dərs vermişdi.
Politoloq Turan Rzayev "Sherg.az"a deyib ki, ATƏT-in Minsk qrupu faktiki olaraq fəaliyyətsizdir və birtərəfli qaydada həmsədrlərdən biri tərəfindən onsuz da ləğv edilib. Ekspertin sözlərinə görə, 8 aprel 2022-ci ildə Rusiyanın xarici işlər naziri Sergey Lavrov Ermənistanın xarici işlər naziri Ararat Mirzoyanla birgə keçirdiyi mətbuat konfransında ATƏT-in Minsk qrupunun ləğv edildiyini demişdi:
"Rəsmi Moskva Ukrayna müharibəsi ilə əlaqədər olaraq digər həmsədrlər ABŞ və Fransanın onlarla birgə işləmədiyini əsas gətirərək bu addımı atmışdı. Bu gün isə Ermənistan tərəfindən qurumun canlandırılmasına çalışılır. Lakin dövlət başçısı İlham Əliyevin “Qarabağ münaqişəsi başa çatıb” arqumenti bu təşəbbüsü mümkünsüz edir. Ümumiyyətlə, münaqişə faktiki olaraq bitib. Qurum münaqişənin sülh yolu ilə həlli məqsədi ilə yaradılmışdı. Geridə qoyduğumuz 30 il ərzində həmsədrlərin regiona əhəmiyyətsiz səfərləri ilə buna nail oluna bilmədi. Əksinə, ildən-ilə Ermənistanın “konyak diplomatiyası”na aludə olan həmsədrlər ciblərini dolduraraq tərəfsizliyi itirdilər. Nəticədə İkinci Qarabağ müharibəsi başladı və proses Azərbaycanın hərbi yola əl atması ilə tənzimləndi".
Analitik vurğulayıb ki, bu gün “Dağlıq Qarabağ” adlı bir münaqişə yoxdur və belə olan təqdirdə bu qurumların fəaliyyətinin mümkünlüyündən söhbət gedə bilməz:
"Diqqətçəkən digər məqam isə Prezident İlham Əliyevin Ermənistanla Azərbaycan arasında normallaşma prosesinin ikitərəfli xarakter daşıdığını vurğulamasıdır. Bu kontekstdə Almaniya kansleri Olaf Şoltsun Azərbaycan və Ermənistan liderlərinin görüşündə “vasitəçi” deyil, “təşəbbüsçü” olmasının qabardılmasının da məqsədi budur. Şolts vasitəçi deyil, ev sahibi kimi görüşün baş tutmasına təşəbbüs göstərib, görüş isə ikitərəfli formatda olub. Çünki Azərbaycan-Ermənistan münasibətləri artıq ikitərəfli xarakter daşıyır. Nəticə etibarilə rəsmi Bakı keçmişin qalıqları olan və artıq bitmiş bir münaqişənin izlərini daşıyan qurumların fəaliyyət göstərməsini istəmir. Buna görə də haqlı tələb kimi adıçəkilən qurumların ləğvini tələb edir".
