Əslində onlar da bunları istəyirlər, çünki rifahları pisdir
REAL Partiyasının icraçı katibi Natiq Cəfərli Azərbaycanın Xankəndi və ətrafında yaşayan vətəndaşlarımızın elektrik enerjisi, qaz və su ilə təminatını öz üzərinə götürməli olduğunu deyib.
Onun sözlərinə görə, Ermənistandan gələn xətlər kəsilməli, əvəzində “Azəriqaz”, “Azərsu”, “Azərenerji” Xankəndi və ətrafına yeni kommunikasiya xətləri çəkməli, erməni əsilli vətəndaşlarımızı həmin xətlərə qoşmalıdır: “Sayğacların quraşdırılması və əhalinin siyahıya alınması baş verməlidir, ödənişlər üçün Xankəndi və digər yaşayış məntəqələrimizdə ödəniş aparatları qurulmalı, manatla ödənişlərin qəbuluna başlanmalıdır. Hətta Xankəndi və ətrafında yaşayan təqaüd yaşında olan erməni əsilli vətəndaşlarımıza pensiya ayrılmalı, onlara bank kartları paylanılmalı, ərazidə bankomatlar quraşdırılmalıdır. Belə addımlarla Xankəndi və ətrafında yaşayan erməni əsilli vətəndaşlarımızı ölkənin kommunikasiya xətlərinə və maliyyə sisteminə inteqrasiya edilməsinin başlanğıcı olacaq. Əgər Ermənistandan qeyri-qanuni gələn xətlər kəsiləcəksə, orada yaşayan insanların bizim sistemə inteqrasiya olmaqdan başqa çarələri qalmayacaq”.
N.Cəfərli qeyd edib ki, elektriki, qazı kimin təmin etməsi Moskvaya fərq etmir:
“Biz erməni əsilli vətəndaşlarımızı dışladıqca, onlar rusun qucağına daha bərk oturacaq və onları o qucaqdan qoparmaq mümkünsüz olacaq. Zatən Kreml o qondarma qurumu de-fakto tanıyıb. Biz aktiv olmasaq, məqamı gəlsə, “rusməramlıların” burnu biz tərəfdən qanasa, həmən “de-jure” də tanıyacaqlar. Bunu istəyirsiniz?!”.
Sosial Tədqiqatlar Mərkəzinin baş məsləhətçisi, siyasi şərhçi Tural İsmayılov “Şərq”ə açıqlamasında təklifə münasibət bildirib:
“Əlbəttə, Xankəndidə yaşayanlar Azərbaycan vətəndaşlarıdırlar. Bunu Prezident İlham Əliyev də dəfələrlə deyib. Dövlət başçısı bildirib ki, soydaşlarımıza qarşı cinayətdə iştirak etməyən ermənilər Azərbaycanın şəxsiyyət vəsiqəsini əldə edə bilərlər. Əslində Xankəndidə yaşayan ermənilər də bunu istəyirlər. Çünki rifahları pisdir. Fikrimcə, üçtərəfli razılıqdakı şərtlər yerinə yetirildikdən, o cümlədən Qarabağdakı ermənilər oradan çıxarıldıqdan sonra istəyən ermənilərin Azərbaycana inteqrasiyası mümkün olacaq. Biz multikultural dövlətik. Amma Xankəndidə hazırda separatçıların olduğunu nəzərə alsaq, fikrimcə, belə addımları indidən atmaq tezdir”.
Kənan
