Prezident İlham Əliyev avqustun 24-də BMT-nin ölkəmizdə yeni təyin olunmuş rezident əlaqələndiricisi xanım Vladanka Andreyevanı qəbul edib. Dövlət başçısı çıxışı zamanı YUNESKO ilə münasibətlərdən danışıb: “Bildiyiniz kimi, YUNESKO ilə də təmasdayıq. Biz YUNESKO-nu, demək olar ki, 30 ilə yaxındır gözləyirik. Bilmirəm bunu bilirsiniz ya yox biz, bir neçə il bundan öncə hələ işğal dövründə, YUNESKO-nu buraya səfər etməyə və bizim ərazilərdə nələrin törədildiyini görməyə dəvət etmişdik.
Çünki, ATƏT-in Minsk qrupu işğal olunmuş ərazilərə artıq iki faktaraşdırıcı missiya göndərmişdi. Biz onlardan yenidən bir missiya göndərməyi xahiş etdik, lakin onlar göndərmədilər. Biz YUNESKO-dan tarixi abidələrimizə erməni təcavüzkarları tərəfindən dəymiş ziyanı gəlib görməyi xahiş edirdik, lakin onlar imtina etdilər. YUNESKO rəsmiləri dedilər ki, YUNESKO siyasi məsələlərə qarışmır. Lakin, müharibə bitdikdən sonra YUNESKO tərəfindən onların gəlmək istədiyinə dair siqnallar aldıq. Əlbəttə, biz öz təəccübümüzü bildirdik. Çünki, demək olar, 30 il idi ki, biz onları çağıranda gəlmirdilər. Müharibədən sonra isə gəlməyə qərar verdilər. Buna görə biz buna razılaşdıq və mənim də bildiyim qədər son məlumat belə idi ki, missiya artıq yaradılıb, amma indi Ermənistan yenə etiraz edir. Buna görə yenə də missiya gecikir”.
Millət vəkili Cavid Osmanov bu barədə “Sherg.az”a münasibət bildirdi:
“Prezident BMT-nin yeni təyin olunmuş rezident əlaqələndiricisini qəbul edərkən bir çox mühüm məqamlara toxundu.
Eyni zamanda işğal dövründə erməni vandalizmi, düşmənlərin mülki obyektləri, məscidləri dağıtdıqları diqqətə çatdırıldı.
O da vurğulandı ki, indiyədək YUNESKO-nu fakt araşdırıcı missiyasını yerinə yetirməkdən ötrü Qarabağa dəvət etsək də, qurum müxtəlif bəhanələrlə bundan imtina etmiş, “Biz siyasi məsələlərə” qarışmırıq demişdi. Azərbaycanın qələbəsindən sonra YUNESKO torpaqlarımıza gəlmək barədə mesaj verdi. Qəbul etdik.
Amma yenə də gəlmədilər. Çünki Ermənistan etiraz etdi. Hərçənd düşmənin bunun üçün heç bir hüquqi əsas yoxdur”.
C.Osmanovun fikrincə, bu, ölkəmizə qarşı qərəzli mövqedən xəbər verir:
“Görünür, ermənipərəst qüvvələr öz işlərini görürlər. Bəzi beynəlxalq qurumlar, o cümlədən YUNESKO ikili standartlardan çıxış edir. Biz də zaman-zaman buna məruz qalırıq. Çünki Aəzrbaycanın müstəqil siyasət yeritməsini istəmirlər. Amma rəsmi Bakının istənilən beynəlxalq qurumu, o cümlədən YUNESKO-nu ölkəmizə dəvət etməyə haqqı var.
YUNESKO bu işlərlə məşğul olan təşkilat kimi torpaqlarımıza gəlməli, vandalizmlə tanış olmalı və Ermənistana lazımi reaksiyanı göstərməlidir”.
