2023-cü ilin yanvar-oktyabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı əvvəlki ilin müvafiq dövrünə nisbətən 11,3 faiz artaraq 921,1 manat olub.
Bu barədə Dövlət Statistika Komitəsinin məlumatında qeyd edilib.
Qeyd edilib ki, iqtisadiyyatın mədənçıxarma sənayesi, maliyyə və sığorta fəaliyyəti, peşə, elmi və texniki fəaliyyət, eləcə də informasiya və rabitə sahələrində orta aylıq nominal əməkhaqqı daha yüksək olub.
"2023-cü il noyabrın 1-i vəziyyətinə ölkə iqtisadiyyatında muzdla çalışan işçilərin sayı 1729,4 min nəfər olmuş, onlardan 896,9 min nəfəri iqtisadiyyatın dövlət sektorunda, 832,5 min nəfəri isə qeyri-dövlət sektorunda fəaliyyət göstərib.
Muzdla işləyənlərin 19,1 faizi təhsil, 18,5 faizi ticarət; nəqliyyat vasitələrinin təmiri, 12,9 faizi sənaye, 8,4 faizi əhaliyə səhiyyə və sosial xidmətlərin göstərilməsi, 6,5 faizi tikinti, 6,4 faizi dövlət idarəetməsi və müdafiə; sosial təminat, 4,3 faizi nəqliyyat və anbar təsərrüfatı, 3,7 faizi peşə, elmi və texniki fəaliyyət, 3,4 faizi kənd təsərrüfatı, meşə təsərrüfatı və balıqçılıq, 2,1 faizi maliyyə və sığorta fəaliyyəti, 14,7 faizi isə iqtisadiyyatın digər sahələrində məşğul olub", - deyə əlavə edilib.
Məsələ ilə bağlı danışan iqtisadçı ekspert Xalid Kərimli "sherg.az"-a bildirib ki, qeyri- dövlət və qeyri- neft sektorunda maaşdan 12.5 faizə qədər vergi və icbari ödəmələr tutulur:
"Bunun 2.5 faizi işsizlik və icbari tibbi sığortaya görə, 10 faizi isə sosial müdafiə fonduna ödənilir. Amma dövlət sektorunda bu rəqəm daha yüksəkdir. Bu statistika tam həqiqəti əks etdirir. Alınan əməkhaqqını işçinin sayına bölərək orta əməkhaqqını hesablayırlar. Ermənistan və Gürcüstana nisbətən Azərbaycanda orta əməkhaqqı 25 faiz daha azdır. Çox təəssüflər olsun ki, ölkəmiz qonşu dövlərdən geri qalır. Bu məbləğ isə ailədə 1 nəfər işləsə, kifayət etmir. Buna görə də valideynlərin hər ikisi işləməlidir".
