Nazir bürokratik əngəl dedikdə, çox güman ki, sovet dövründən qalan sənədləşdirmə işlərinin uzunluğundan bəhs edir
Azərbaycanlı alimlərin dünya elminə inteqrasiya olunması, dünyanın aparıcı alimlərinin Azərbaycana gəlməsi, burada elmi tədqiqatlara cəlb olunması prioritet istiqamətdir. Bu barədə Elm və Ali Təhsilin Beynəlmilləşməsi Forumunda çıxışı zamanı elm və təhsil naziri Emin Əmrullayev deyib.
Nazir bildirib ki, əgər xaricdən hər hansı tədqiqatçını Azərbaycana alim və ya professor kimi dəvət ediriksə, onun bizim qaydalara uyğun olaraq prosedurlardan keçməsi çətindir: “Loru dildə desək, özünə hörmət edən alim bu prosedurlardan keçmək istəmir, yaxud keçmir. Əgər biz həmin alimləri Azərbaycanda görmək istəyiriksə, o zaman mövcud prosedurlara mütləq yenidən baxmalıyıq”.
E.Əmrullayev vurğulayıb ki, bir çox hallarda tədqiqatçı və alimlər üçün bürokratik proseslər o qədər də asan deyil.
AMEA Fəlsəfə və Sosiologiya İnstitutunun şöbə müdiri, fəlsəfə üzrə fəlsəfə doktoru Faiq Ələkbərli isə “Sherg.az”a açıqlamasında deyib ki, xarici ölkələrdən elm adamlarının, tədqiqatçıların ölkəmizə dəvət olunması ənənəvi bir prosesdir:
“Sadəcə, müasir dövrdə yox, hətta 20-ci əsrin əvvəllərində, xüsusən də Azərbaycan Xalq Cümhuriyyəti qurulanda Osmanlıdan, keçmiş çar Rusiyasının müxtəlif ərazilərinin tanınan, bilinən elm adamları Azərbaycana dəvət olunurdu. Ölkəmiz müstəqillik qazandıqdan sonra da bu proses davam edir. Türkiyədən, Avropa ölkələrindən kifayət qədər tədqiqatçılar gəlir. Gələn qonaqların bizim qaydalara uyğun olaraq prosedurlardan keçməsinə gəldikdə isə elm və təhsil nazirinin konkret olaraq nədən bəhs etdiyini deyə bilmərəm. Çox güman ki, söhbət sovet dövründən qalan sənədləşdirmə işlərinin uzunluğundan bəhs edir. Çünki bu sahədə, həqiqətən də, başağrısı verəcək, insanı bezdirəcək qədər çox sənədlər istənilir, yoxlama prosesi uzun çəkir”.
