Söhbət, sadəcə, iqtisadi sanksiyalardan getmir
İran uranın zənginləşdirilməsini davam etdirərsə, bu, növbəti eskalasiyaya gətirib çıxaracaq
"ABŞ İran hökumətinin beynəlxalq maliyyə sisteminə çıxışını kəsəcək". Bunu ABŞ-nin maliyyə naziri Skott Bessent deyib. Skott Bessent bildirib ki, əgər iranlı olsaydım, bütün pullarımı xarici valyutaya çevirərdi: “Bizim yenilənmiş sanksiyalar siyasətimizin başlanğıcı İran iqtisadiyyatının məğlubiyyəti olacaq. İranın neft sektorunu və PUA istehsalı imkanlarını bağlayacağıq”.
Milli Cəbhə Partiyası başqanınınn müavini, politoloq Məhəmməd Əsədullazadənin “Sherg.az”a açıqlamasına görə, ABŞ administrasiyasının İrana tətbiq etdiyi sanksiyalar, xüsusilə də ölkənin neft sektoruna məhdudiyyətləri ölkə daxilində sosial və siyasi gərginliyə gətirib çıxaracaq:
“Onsuz da İran rialının dollar qarşısında dəyərdən düşməsi hər keçən gün əhalinin real alıcılıq qabiliyyətini aşağı salır. Ölkədə inflyasiyanın psixoloji həddi keçməsinə gətirib çıxarır. Ölkə iqtisadiyyatının tənəzzülünün isə hakimiyyət daxilində siyasi qruplar arasında qarşıdurmaya yol açmasına gətirib çıxarması istisna deyil. Prezident M.Pezeşkian islahatçı qanadı təmsil etməsinə baxmayaraq, Qərblə dialoq baş tutmur. Çünki SEPAH və mühafizəkar dairələr İranın xarici siyasətində sərt xətti davam etdirməklə, Qərblə normallaşmanın qarşısını alırlar. Məhz Qərblə danışıqlar üçün görəvləndirilən xarici işlər naziri Məhəmməd Cavad Zərifin istefası isə İranın işinin daha da çətinləşəcəyini göstərir”.
Politoloqun sözlərinə görə, ABŞ qeyd edilən sanksiyaları tətbiq edib, İran hökumətinin beynəlxalq maliyyə sisteminə çıxışını kəssə, İran neft çıxarmasını dayandıra bilər. Çünki neft satışından valyuta daxil olmasa, neftin çıxarılması baha başa gələcək. M.Əsədullazadə həmçinin qeyd edib ki, D.Tramp İranda hakimiyyətin çökməsi üçün əlindən gələni edəcək:
“Söhbət sadəcə iqtisadi sanksiyalardan getmir. İran uranın zənginləşdirilməsini davam etdirərsə, bu, növbəti eskalasiyaya gətirib çıxaracaq. Artıq ABŞ İsrailə İranın yeraltı nüvə və raket bunkerlərini dağıda bilən bombalar verib. İran rejimi öz hərbi imkanlarını genişləndirsə də, havadan müdafiə sistemləri sıradan çıxarılıb. Ölkə havadan hücum təhlükəsinə görə müdafiəsiz qalıb. Fikrimcə, İranın nüvə və raket mərkəzlərinə hava hücumları istisna deyil”.
