Əmək və əhalinin sosial müdafiəsi naziri Sahil Babayev pensiya ödənişlərinin gecikdirilməsi ilə bağlı iddialara cavab verib.
Nazir jurnalistlərə açıqlamasında bildirib ki, bununla bağlı dəfələrlə açıqlama verilib.
“Biz bütün pensiyaları avansla ödəyirik. Həmin ayın pensiyası ayın sonunda ödənilməlidir. Sadəcə Azərbaycan Hökumətinin növbəti humanist addımı ondan ibarətdir ki, biz pensiyaları ayın sonunu gözləmədən ödəyirik. Ümumiyyətlə, pensiyalar sosial sığorta haqlarının hesabına ödənilən vəsaitdir. Sosial sığorta haqlarının toplanmasına uyğun olaraq, ayın bəlli dövrlərində pensiya fondu tərəfindən elan verilir və müvafiq ərazilər üzrə ödənişlər həyata keçirilir. Bir daha deyirəm ki, ödənişlər ayın sonunda ödənilməli olduğu halda ayın 10-15-i arasında bir qisim ərazilərimiz, 15-20-si arasında bir qisim ərazilərimizdə həyata keçirilir. Vaxtında ödəsək, bu o deməkdir ki, ayın sonunda ödəməliyik, bu da əhalimizin ziyanına olacaq”.
Məsələ ilə bağlı "Sherg.az"a danışan iqtisadçı ekspert Xalid Kərimli bildirib ki,
hər ay pensiya, təqaüd və ünvanlı dövlət sosial yardımlarının ödənişi müəyyən edilən qrafik əsasında həyata keçirilir:
" Pensiyalar çox vaxt ay bitdikdən sonra ödənilir. Yəni vəsait ayın sonunda və yaxud növbəti ayın əvvəlində ödənilməlidir. Bu prosses əmək haqlarında olduğu kimi aparılır. Həmçinin, pulun zaman dəyəri var. Pul tez veriləndə daha yaxşı faydalanmaq olur. Məsələn, kreditin, zəruri ehtiyacın ödənilməsində kömək olur. Əlavə olaraq qalıq kartda qaldıqda faiz, gəlir hesablanır. Ona görə də təqaüdlərin tez alınması pensiyaçılar üçün xeyirlidir. Son 20 ildə heç vaxt pensiyaların ödənməsində gecikmə olmayıb. Bu da ölkənin maliyyə vəziyyəti ilə əlaqədar bir nüansdır".
