"Gözəl qızların Allaha, sonra da mənə əmanətdir. Yerin hər yerdə görünəcək"
Bu gün müğənni Xatunun vəfat edən stilist qardaşı Balaşın ölümündən 40 gün ötür.
Axşam.az xəbər verir ki, kədərini sosial şəbəkədə dilə gətirən Xatun qardaşı ilə bağlı bunları yazıb:
"Artıq 40 gün keçdi. Sənsiz yaşayıram. Canım o qədər yanır ki, sözlə ifadə etmək mümkün deyil. Mənim əvəzolunmazım, dərd ortağım, məsləhət yerim, göznurum, atam, anam, dostum, qardaşım, can parçam. Sənsiz bir boşluğun içində dağılan parçalarımı toplamağa çalışıram. Dünyanı boz görürəm, sanki bütün gözəl rənglər səninlə birgə yoxa çıxıb. Mən bilmirəm necə özümə gələcəm, nə vaxt ayağa qalxa biləcəm. Sənin iki gül balan indi mənim ən böyük təskinliyimdir. Rəbbim mənə güc, möhlət, imkan versin, körpələrin üçün arzuladığın həyatı onlara yaşada bilim. Gözəl qızların Allaha, sonra da mənə əmanətdir. Yerin hər yerdə görünəcək. Mənim yaraşıqlı, gözəl qəlbli qardaşım. Nurlar içində yat. Allah sənə qəni-qəni rəhmət eləsin!"
Qeyd edək ki, Balaş 2011-ci ildə Gülnarə adlı xanımla ailə qurub. Onların bu nikahdan əkiz qız övladı dünyaya gəlib. Stilistin ölümünə səbəb isə xəstəlik olub.
