Azərbaycan Tibb Universitetinin əməkdaşlarının maaşları artırılır. Axar.az xəbər verir ki, bu haqda ATU-nun Elmi Şurasının bu gün keçirilən iclasında qərar verilib. Qərara əsasən, ATU-da çalışan əməkdaşların, professor-müəllim heyətinin sosial müdafiəsinin və maddi rifah halının daha da gücləndirilməsi məqsədilə onlara verilən vəzifə maaşları 01 sentyabr 2019-cu il tarixindən etibarən orta hesabla 10% artırılır.
ATU-nun Elmi Şurasının bu qərarı "Ali təhsil müəssisələrində və magistratura səviyyəsi üzrə Azərbaycan Milli Elmlər Akademiyasında yeni maliyyələşmə mexanizminin tətbiq edilməsi barədə” Azərbaycan Respublikası Prezidentinin 2010-cu il 10 fevral tarixli Fərmanının 6-cı bəndinin icrasının təmin olunması məqsədilə Nazirlər Kabinetinin 2019-cu il 3 oktyabr tarixli Qərarı sayəsində gerçəkləşib. Həmin qərara əsasən, ayrı-ayrı ixtisaslar üzrə dövlət sifarişi ilə ali təhsil müəssisələrində təhsil alan hər bir təhsilalana düşən təhsil xərclərinin miqdarı artırılıb.
Xatırladaq ki, bu il martın 1-də universitetdə çalışan bütün əməkdaşların və professor-müəllim heyətinin əlavə əmək haqqları 20% artırılmışdı. Beləliklə, bu il ərzində ATU əməkdaşlarının əmək haqqısı 2-ci dəfə artırılmış olur.
