2020-2021-ci tədris ili üzrə şagirdlərin geyim formalarının təsvirlərini müəyyən edən layihəyə dair ictimai rəyin öyrənilməsinə başlanılıb. Təhsil Nazirliyi yanında İctimai Şurada ümumi təhsil müəssisələrində məktəbli formasının tətbiqinə dair müzakirələr keçirilib.
Görüşdə məktəbli formasının tətbiqi mövzusunun ictimai müzakirəsinin vacibliyi bildirilib. Təhsil Nazirliyi tərəfindən bu məsələyə ciddi yanaşıldığı, məktəbli formasının tətbiqi ilə bağlı nazirlik tərəfindən geniş müzakirələr aparıldığı qeyd edilib. Həmçinin ictimai rəyə çıxarılan vahid məktəbli formalarının təsvirləri ilə bağlı ən çox səsləndirilən təkliflər müzakirə edilib. Daha sonra mütəxəssislər məktəbli formalarının tətbiqinə dair mövcud standartlar və keyfiyyət məsələləri ilə bağlı öz fikirlərini səsləndiriblər.
![](https://sherg.az/uploads/editor/f9b8c4c4707ca6fb615a71b35b9ecf07.jpg)
Təhsil Nazirliyi yanında İctimai Şurada keçirilən müzakirələrdə iştirak etdiyini vurğulayan Etibar Əzimovun sözlərinə görə, görüş zamanı onlara deyilib ki, məktəbli formaları ilə bağlı hər kəs öz rəyi, təklifi və imkanları barəsində arayış təqdim etsin:
"Biz təkliflərimizi təqdim etdikdən sonra İctimai Şura yenidən yığışacaq və qərar veriləcək".
6 istehsalçının müzakirələrdə iştirak etdiyini vurğulayan BTE-nin satış şöbəsinin müdiri deyib ki, hər kəs öz nümunələrini təqdim edəcək. Biz 10 ildir bu sahədəyik, amma sektora yeni qoşulan istehsalçıların da təklifləri dinləniləcək. Nazirlik tərəfindən neçə nümunə olacağına və rənglərinə qərar veriləcək:
"BTE məktəbli formalarını Türkiyədən aldığı parçalardan istehsal edir və bunu təstiq edən sertifikatımız da var. Ən azı bir il zəmanətimiz var. Elə valideyn var ki, bir paltarı 2-3 sezon geyindirə bilir. Bizim formaların keyfiyyəti ilə bağlı heç bir problem yoxdur. Nazirlik yeni dizayn məktəbli formalarının istehsalını istəyir. Ola bilsin bu formalar öz yerində qalacaq və əlavə olaraq da yeni dizayn formalar istehsal ediləcək.
![](https://sherg.az/uploads/editor/c9c4a604a5a45bb2ac8fe567b677967e.jpg)
Yeni dizaynda olan məktəbli formaları 2020-2021-ci tədris ili üzrə şagirdlərə təqdim edilsə də, şagirdlər əvvəlki formalarını da geyinəcəklər. Elə ailələr var ki, məktəbə 4-5 uşaq göndərir. Onların köhnə formaları atıb yenidən hər uşağa forma almaq imkanı yoxdur axı. Çox güman ki dəyişiklik tədricən aparılacaq".