Tədrisi digər dillərdə aparılan məktəblərdə "Azərbaycan tarixi" ilə yanaşı digər fənlərin də ana dilində tədrisi məsələsinə aydınlıq gətirilib.
APA xəbər verir ki, bu barədə Təhsil İnstitutunun direktoru səlahiyyətlərini müvəqqəti icra edən, elm və təhsil nazirinin müşaviri Elnur Əliyev bu gün jurnalistlərə açıqlaması zamanı deyib.
O qeyd edib ki, Azərbaycan dilinin tədrisi genişlənir:
“Artıq “Ədəbiyyat”, “Hərbi hazırlıq” və “Musiqi” fənləri tədris dilindən asılı olmayaraq bütün siniflərdə Azərbaycan dilində tədris olunur və bu fənlər üzrə qiymətləndirmə də həmin dildə aparılır. Məqsəd şagirdlərin öyrənmə prosesinə təsiri və nəticələrin qiymətləndirilməsidir. Hazırda digər fənlərin də Azərbaycan dilində tədrisi ilə bağlı müzakirələr davam edir. Konkret hansı fənlərin bu siyahıya əlavə olunacağı barədə qərar isə növbəti illərdə veriləcək”, - o vurğulayıb.
