“Dövlət qulluğu haqqında” Azərbaycan Respublikasının Qanununa 31 may 2021-ci il tarixli 340-VIQD nömrəli Qanunla bir sıra dəyişikliklər edilib. Bu barədə Dövlət İmtahan Mərkəzi məlumat yayıb. Bildirilib ki, qanuna edilən dəyişikliklər dövlət qulluğuna qəbul, fəaliyyətin davam etdirilməsi, yüksəliş, ehtiyat kadrların idarə edilməsi və digər məsələləri əhatə edir. Dəyişikliklərin biri də on il stajı olan şəxslərin dövlət imtahanından azad olunması ilə bağlıdır.
Təhsil eksperti Kamran Əsədov “Sherg.az”a açıqlamasında bu məsələyə fikir bildirdi:
““Dövlət qulluğu haqqında” Qanunda nəzərdə tutulub ki, dövlət qulluğuna qəbul müsabiqə və müsahibə yolu ilə keçirilir. Bu proses ölkəmizdə tam obyektiv və şəffaf aparılır.
Fikrimcə, dövlət orqanlarında uzun ilər işləyən şəxslərin test mərhələsindən azad olunması ədalətlidir. Çünki onların xeyli təcrübəsi var.
Gənc kadrlar isə işin spesifik cəhətlərini bilmirlər. İkinci bir tərəfdən bu, rəqabətli mühitin yaranmasına gətirib çıxaracaq. Sadəcə problem vakant yerlərlə bağlıdır.
Dövlət orqanları vakant yerlərlə bağlı müntəzəm məlumat verməli və namizədlərin müsabiqə, müsahibə mərhələlərindən keçmələri tələb edilməlidir”.
