"2023-cü ilin oktyabr ayından çıxarışı olmayan torpaq sahələri üzərində aparılacaq tikintilərə kommunikasiya xətlərinin çəkilməsi qadağan olunub. Buna görə hazırda çıxarışlı torpaqlara tələbat artıb. Çıxarışı olmayan torpaqların qiymətində stabillik müşahidə edilsə də, çıxarışı olan torpaqların qiymətində artım var".
Bunu Oxu.Az-ın əmlak bazarındakı vəziyyətlə bağlı suallarını cavablandıran əmlak məsələləri üzrə ekspert Elnur Fərzəliyev deyib.
Məsələ ilə bağlı "Sherg.az"a danışan iqtisadçı ekspert Xalid Kərimli bildirib ki, torpaq sahələrində qiymət artımı müşahidə edilir və bu bahalaşma davam edəcək:
“Bakı şəhərində tikintiyə yararlı torpaq sahəsinin həcmi hər keçən gün azalır. Bu da mənzillərin qiymətinin bahalaşmasının ən böyük səbəblərindən biridir. Əvvəllər standartlara fikir verməyərək evlər tikirdilər. Amma indi şəhərsalma qaydaları da bunu icra edirlər. Həmçinin keçmişdə pulu alıb göz yumurdular, amma indi icra edirlər. Şəhərsalma qaydaları da ciddi surətdə nəzarətdədir. Bu isə mənzillərin qiymətinin artmasına təsir göstərir. Hazırda bina tikmək üçün ya boş torpaq tapmalısan, ya nəyisə sökməlisən və yaxud da kimisə köçürməlisən. Bunların hər biri də xərc artıran prosesləridir. Ümumiyyətlə Bakı üzrə torpaq qiymətlərində qarşıdakı zamanlarda da bahalaşma görəcəyik. Bu, artım son deyil”.
