Azərbaycan Türk Ocağı İctimai Birliyinin rəhbər heyəti və üzvləri Türkiyə ilə həmrəylik nümayiş etdirmək, baş vermiş dəhşətli zəlzələ nəticəsində həyatını itirənlərin xatirəsini yad etmək üçün Bakıdakı Türkiyə Səfirliyini ziyarət ediblər. Türk Ocağının üzvləri zəlzələdə ölənlərin xatirəsini anmaq məqsədilə səfirliyin qarşısında yaradılan xatirə guşəsinin önünə gül dəstələri düzüblər, ruhlarına dualar oxuyublar.
Azərbaycan Türk Ocağı İctimai Birliyinin sədri Akif Aşırlı və birlyin üzvləri Türkiyənin Azərbaycandakı səfirliyinin mətbuat müşaviri Hüseyn Altınalana zəlzələdə həyatını itirmiş şəxslərə görə baş sağlığı verib, yaralılara şəfalar diləyiblər. Akif Aşırlı vurğulayıb ki, Azərbaycan dövləti və xalqı hər zaman bütün imkanları ilə qardaş Türkiyənin yanındadır. Azərbaycan Türk Ocağı da belə acı bir gündə türk xalqının yanındadır, dərdlərinə ortaqdır. Hüseyn Altınalan ziyarətə, maddi-mənəvi dəstəyə görə, Türk Ocağının üzvlərinə təşəkkürünü bildirib. İnsanlar fasiləsiz olaraq səfirlik önünə axın edir, guşə önündə şəhidlərə ehtiramlarını bildirir, qardaş Türkiyənin dərdi ilə dərdlənirlər. Ziyarətə gələn vəfakar azərbaycanlılar arasında azyaşlı bağça uşaqları da var idi. Əllərində Türkiyə və Azərbaycan bayraqları tutmuş balaca ürəklər iki-üç cərgəlik sıra ilə səfirlik önünə addımlamağa tələsirdilər..
Daha sonra Azərbaycan Türk Ocağı İctimai Birliyinin zəlzələdə zərər görmüş, ev-eşiksiz qalmız qardaşlarımız üçün hazırladıqları 7 qutu və bir bağlama yardım toplanma məntəqəsi olan - Heydər Əliyev adına İdman-Konsert Kompleksinə aparılıb. Qutularda zəlzələdən zərər çəkmiş insanlar üçün zəruri ehtiyaclar - qida, qeyri-ərzaq malları, isti qış geyimləri, papaqlar, corablar, əlcəklər, fanarlar və dugər yardımlar olub.
Millət vəkili Qənirə Paşayeva da Azərbaycan Türk Ocağı adından əlavə olaraq qış gödəkçələri və ayaqqabıları yardım toplanan məntəqəyə göndərib.
Qeyd edək ki, Azərbaycan xalqı Türkiyədə baş vermiş güclü zəlzələdən zərərçəkənlərə kömək üçün səfərbər olub. Qardaş köməyinə çatmaq üçün vətəndaşlar yardım toplama məntəqələrinə axın edirlər. Toplanan yardımlar könüllülər tərəfindən çeşidləndikdən sonra TIR-lara yüklənir və qardaş ölkəyə yola salınır.
Xatırladaq ki, qardaş ölkədə baş vermiş təbii fəlakətlə bağlı Türkiyə Prezidenti Rəcəb Tayyib Ərdoğan ölənlərin xatirəsini anmaq üçün Türkiyədə bir həftə matəm elan edib. Qardaş ölkənin Azərbaycandakı səfirliyinin önündəki Türkiyə bayrağı da yarıya qədər endirilib.
