Moskva ilə Bakı tərəfdaş və müttəfiq olaraq qalmalıdır.
Bunu Kremlin sözçüsü Dmitri Peskov bildirib.
O vurğulayıb ki, Rusiya ilə Azərbaycan arasında yaranan problemlər konstruktiv şəkildə həll edilməlidir.
“Moskva Bakı ilə tərəfdaşlıq və müttəfiqlik münasibətlərində qalmaq istəyir və hesab edir ki, bütün fikir ayrılıqları konstruktiv şəkildə həll edilməlidir. Biz əvvəlki kimi hesab edirik ki, məntiq yalnız bir şeydən danışır: Rusiya və Azərbaycan ən yaxın tərəfdaş və müttəfiq ölkələrdir və belə də qalmalıdırlar. Yaranan problemlər, şübhəsiz ki, konstruktiv şəkildə həll edilməlidir. Bu, bizim ikitərəfli münasibətlərimizin ümumi ruhuna uyğun gəlməlidir”, - Kremlin rəsmi nümayəndəsi vurğulayıb.
Politoloq Tural İsmayılov Sherg.az-a deyib ki, Kremlin sözçüsü Dmitri Peskovun "Bakı ilə Moskva müttəfiq və tərəfdaş olaraq qalmalıdır" fikri Rusiya tərəfinin yaranan gərginliyi açıq şəkildə etiraf etmədən onu nəzarətdə saxlamağa çalışdığını göstərir:
"Peskov diplomatik ritorikadan istifadə edir, amma son hadisələrlə bağlı konkret mövqe ortaya qoyulmur. Bu isə Kremlin ya real problemləri qəbul etmək istəmədiyini, ya da münasibətləri bir müddət “dondurulmuş dialoq” rejimində saxlayacağını göstərir. Peskovun “konstruktiv həll” çağırışı ikili oyunun tərkib hissəsi ola bilər – yəni həm narazılığı etiraf et, həm də məsuliyyəti qarşı tərəflə paylaş. Rusiya üçün Cənubi Qafqazda nüfuz itkisi ciddi təhlükədir və Azərbaycanla əlaqələrin pozulması bu prosesə təkan verə bilər. Lakin Kremlin davranışı göstərir ki, onlar regiondakı hadisələri təkcə siyasi yox, geosiyasi baxışla qiymətləndirirlər. Ermənistanla münasibətləri yenidən tənzimləyən Moskva Bakıya qarşı səssiz diplomatiya aparır. Son iqtisadi təzyiqlər, logistika problemləri və rəsmi dairələrin səssizliyi münasibətlərin “müttəfiqlik” çərçivəsindən çıxdığını göstərir. Bu nöqtədə rəsmi Moskva həm prosesləri uzadır, həm də münasibətlərin dərinliyini “təhdidli sakitlik” içində saxlayır".
Politoloq qeyd edib ki, Bakının suveren və açıq mövqeyi fonunda Kreml daha çox müdafiədədir:
"Münasibətlər hələlik qırılma nöqtəsinə çatmasa da, qarşılıqlı etimad aşkar şəkildə zəifləyib. Kreml bu susqunluqla həm daxili ictimaiyyəti, həm də region ölkələrini sakitləşdirmək istəyir. Amma Peskovun açıqlamaları konkret deyil, sanki gərginliyin yalnız “formal tərəfdaşlıq” çətiri altında ötüşməsi niyyəti var. Gələcəkdə münasibətlər birgə layihələr deyil, daha çox real maraqların sərhədləri daxilində tənzimlənəcək".
